संघीय लोकतान्त्रिक गणतन्त्र नेपाल नलेख्ने निर्णयप्रति नेबिसंघको गम्भीर ध्यानाकर्षण

१८ कार्तिक, काठमाडौं । सरकारले संघीय लोकतान्त्रिक गणतन्त्र नेपाल नलेख्ने भनि गरेको निर्णयप्रति नेपाल विद्यार्थी संघको गम्भीर ध्यानाकर्षण भएको छ ।

नेबिसंघका महामन्त्री बलदेव तिमल्सिनाद्धारा जारी विज्ञप्तिमा भनिएको छ, असोज ११ गते बसेको मन्त्रिपरिषद बैठकको निर्णय अनुसार भन्दै मातहतका निकायमा ‘संघीय लोकतान्त्रिक गणतन्त्र नेपाल’ नेलेख्न र त्यसको स्थानमा ‘नेपाल’मात्रै लेख्न कानून,न्याय तथा संसदीय मन्त्रालयले मातहत कार्यालयलाई गरिएको परिपत्र संविधानको मर्म र भाबना विपरीत छ ।

परिवर्तनका लागि जीवन बलिदान गरेका शहिद तथा जिवनको उत्सर्ग गर्न तत्पर योद्दाहरुको अपमान र गणतन्त्रको मर्म बिपरित एक पछि अर्को निरन्तरको जनबिरोधी र ब्यबस्था बिपरितको गतिविधि र निर्णयले बर्तमान सरकार जनताको बलिदानी र हाम्रो संघर्ष बाट प्राप्त उपलब्धीको सम्बर्द्धन र संरक्षण गर्न भन्दा निश्तेज गराउने खेलमा उद्यत रहेको पुष्टी भएको छ ।

परिवर्तन संग जोडिएका प्रमुख बिषयहरुमा समयमा नै गम्भीर बन्न र हाम्रा बलिदानी, त्याग,तपस्या र संघर्षका उपलब्धिहरुका बिषयमा खेलबाड नगरी तत्काल यस्ता त्रुटिपूर्ण निर्णय सच्याउन गम्भीर चेतावनी दिन चाहन्छु, महामन्त्रीद्धारा जारी विज्ञप्तिमा उल्लेख छ ।