प्रधानमन्त्री ओलीलाई किन भेट्दैछन् भारतीय सेनाध्यक्ष नरवाणे ?

१८ कात्तिक, काठमाडौं । भोलि नेपाल भ्रमणमा आउन लागेका भारतीय सेनाध्यक्ष मनोज मुकुन्द नरवाणेले प्रधानमन्त्री केपी शर्मा ओलीसँग भेट्ने भएका छन् । भ्रमणका क्रममा नरवाणेले राष्ट्रपति विद्यादेवी भण्डारीबाट नेपाली सेनाको मानार्थ सेनापतिको दर्ज्यानी चिन्ह लगाएपछि प्रधानमन्त्री ओलीसँग भेटवार्ता गर्ने कार्यतालिका छ ।

कालापानी, लिपुलेक र लिम्पियाधुरालाई समेटेर भारतले नक्सा जारी गरेपछि नेपाल–भारतबीच सीमा विवाद उत्कर्षमा छ । त्यसयता दुई मुलुकबीच राजनीतिक र कुटनीतिक तहमा सम्वाद भएको छैन् । सोही बेला विवादास्पद अभिव्यक्ति दिएका नरवाणे आफै नेपाल भ्रमणमा आउनुलाई अर्थपूर्ण ढंगले हेरिएको छ ।