सप्तरीमा कोरोनाले थप ३ जनाको ज्यान गयो

१८ कात्तिक, सप्तरी । सप्तरीमा तीन जना संक्रमितको ज्यान गएको छ । महदेवा गाउँपालिकाका एकजना, हनुमाननगर कंकालिनी नगरपालिकाका एकजना र अग्निसाइर कृष्णासावरण गाउँपालिकाका एकजना कोरोना संक्रमित गरी तीन जनाको मृत्यु भएको हो ।

हनुमाननगर कंकालिनी नगरपालिका २ का ५३ वर्षीय पुरुषको न्यूरो अस्पताल विराटनगरमा उपचारका क्रममा सोमबार राति मृत्यु भएको जिल्ला स्वास्थ्य कार्यालय, सप्तरीले जनाएको छ । अस्पतालका अनुसार मृतक पुरुष मधुमेह तथा उच्च रक्तचापका बिरामी समेत थिए ।

यस्तै महादेवा गाउँपालिका ६ ढिकुलीका एक युवकको वीपी कोइराला स्वास्थ्य विज्ञान प्रतिष्ठान धरानमा सोमबारै राति मृत्यु भएको छ । यस्तै अग्निसाइर कृष्णासावरण गाउँपालिका ५ का ६२ वर्षीय पुरुषको विराटनगरस्थित नोबेल मेडिकल कलेजमा उपचारका क्रममा मृत्यु भएको छ । योसँगै सप्तरीमा कोरोना संक्रमणका कारण ज्यान गुमाउनेको संख्या २८ पुगेको छ ।