भारतीय टेलिभिजनमा चिच्याउने गोस्वामी पक्राउ

१९ कार्तिक, एजेन्सी । भारतीय टेलिभिजन च्यानल रिपब्लिक टेलिभिजनका प्रधानसम्पादक अर्नब गोस्वामी पक्राउ परेका छन् । अलीबागका ५३ वर्षीय इन्टेरियर डिजाइनरलाई आत्महत्या गर्न बाध्य पारेको आरोपमा उनी पक्राउ हुन् ।

यसै वर्ष महाराष्ट्र सरकारले घटनाको सिआईडी जाँच गर्न आदेश दिएको थियो। प्रहरीले अर्नबको घरको खानतलासी पनि गरेको छ। अर्नब र अन्य दुई जनाले ५३ वर्षीय इन्टेरियर डिजाइनरको बाँकी पैसा नदिएपछि ५३ वर्षीय डिजाइनरसहित उनकी आमाले आत्महत्या गर्नुपरेको भन्दै घटनामा सिआईडीद्वारा पुनः जाँचको आदेश दिइएको थियो।

राज्यका गृहमन्त्री अनिल देशमुखले मृतक डिजाइनर अन्वय नाइककी छोरी आज्ञा नाइकले बाँकी पैसा नदिएको बारेमा जाँच नभएको दाबी गर्दै आएको बताए। उनका अनुसार यसै कारणले डिजाइनर र उनकी आमाले आत्महत्या गर्न बाध्य भएका हुन्।

अन्वय नाइकले आत्महत्या गर्नुअघि लेखेको सुसाइड नोटमा उनले आफूले पाउनुपर्ने ५ करोड ४० लाख भारतीय रुपैयाँ भुक्तानी नपाएपछि आत्महत्या गर्न बाध्य भएको उल्लेख गरेका थिए। रिपब्लिक टिभीले यो खारोपको खण्डन गर्दै जिम्मेवारीबाट पन्छिदै आएको छ ।