बालुवाटारमा ओलीकाे अडानले पाँच नेता हिस्स !

२२ कार्तिक, काठमाडौं । सत्तारुढ नेपाल कम्युनिस्ट पार्टी (नेकपा)का अध्यक्ष केपी ओली र कार्यकारी अध्यक्ष पुष्पकमल दाहाल “प्रचण्ड”सहित सचिवालयका पाँच नेताबीच शनिबार पौने २ घण्टा छलफल भएको छ ।

शुक्रबार पार्टी कार्यालय धुम्बाराहीमा भएको छलफलअनुसार सचिवालय बैठकका लागि प्रधानमन्त्री एवं अध्यक्ष ओलीलाई मनाउन पाँच नेता बालुवाटार पुगेका हुन ।

नेताहरुले सचिवालय बैठकका लागि सहमति दिन ओलीलाई लिखित रुपमा आग्रह गरेका छन् ।  शनिबार नै सचिवालय बैठक तोक्ने प्रयास भएपनि प्रधानमन्त्रीले आफूले सल्लाह गर्नुपर्ने बताएपछि सफल नभएको एक नेताले बताए ।

छलफलको सुरुवात कार्यकारी अध्यक्ष प्रचण्डले गरेका थिए । उनी सचिवालय बैठकका लागि सहमति दिन लिखित आग्रह गर्नुपर्ने अवस्था किन आयो भनेर पृष्ठभूमिसहित बोलेका थिए । प्रचण्डले स्थायी कमिटी बैठक टुंग्याउने क्रममा सहमतिको मस्यौदा बनाउन कार्यदल गठन भएसँगै गडबडी सुरु भएको बताए ।

तर कार्यदल गठनसँगै प्रधानमन्त्री ओली सहमति विपरित चल्न थालेको प्रचण्डले बताएका छन् ।  स्थायी कमिटीकै निर्णय कार्यान्वयन नभएपछि बैठक बसौंभन्दा ओली नमानेकाे उनले बताएका छन् ।

त्यसपछि बैठकमा पार्टी उपाध्यक्ष बामदेव गौतम बाेल्दै सकेसम्म बैठक बस्न बस्नै नमान्ने, बैठक बसी हाले पनि नबोल्ने तथा निष्कर्षमा पुग्नै नदिने र निष्कर्षमा पुगे त्यो निश्कर्ष नै नमान्ने गरेको भन्दै ओलीको आलोचना गरे ।

यस्तै छलफलमा वरिष्ठ नेता माधवकुमार नेपालले पनि प्रधानमन्त्री ओलीलाई तपाई आफ्नो आत्मालोचना गर्न किन तयार नहुने ? यतिका नेताहरूले किन बिरोध गरे भनेर नसोच्ने भनेर प्रश्न गरेका थिए ।

भेटघाटमा बाेल्दै नेता झलनाथ खनालले बैठक नै नबस्ने र छलफल नै नगर्नु ओली  गलत भएको बताएका छन । यस्तै पार्टी प्रवक्ता नारायणकाजी श्रेष्ठले कोभिड-१९ को संक्रमण, त्यसले स्वास्थ्य र आर्थिक क्षेत्रमा पारेको संकट लगायतका विषयमा छलफल गर्न बैठक माग गर्दै आफूले दुबै अध्यक्षलाई पत्र लेखेको स्मरण गराएका थिए ।

पत्रमा उनले सरकारले २ अर्ब रुपैयाँभन्दा बढीको राहत प्याकेज ल्याउनुपर्ने माग  र प्रधानमन्त्रीले रअका प्रमुखसँग गरेको भेट लगायत  तत्काल सचिवालय बैठक बोलाउन माग गरेका थिए । तर बैठक राख्नु त परको कुरा, आफूलाई जवाफ समेत नदिएको प्रवक्ता श्रेष्ठको गुनासो छ ।

भेटघाटमा पाँचै नेताको धारणा सुनिसकेपछि ओली बोलेका थिए । उनले अर्का अध्यक्ष प्रचण्डमाथि जालझेल र गुटबन्दी गरेको आरोप लगाएका छन् । तर नेताहरुले ‘तपाईँ पार्टीको बैठक बस्न नचाहने, आफूखुशी भेला र छलफल गर्ने, हामीले चाहिँ हेरेर बस्नुपर्ने ?’ भन्दै प्रतिप्रश्न गरेका थिए । छलफलमा पाँच नेताले सचिवालयको बैठक सकेसम्म भोलि, नभए पर्सि बोलाउनुपर्ने भन्दै ओलीको सहमति मागेका थिए ।