किशोरीलाई प्रलोभन देखाएर बेच्न लैजाने गिरोहका नाइकेसहित तीनजना जेल चलान

२३ कार्तिक, विराटनगर । किशोरीलाई बेच्न भारत लैजाने गिरोहका नाइकेसहित तीनजना जेल चलान भएका छन् ।  असोज ४ गते सुनसरीको रामधुनी नगरपालिका घर भएकी १८ वर्षीया किशोरीलाई प्रलोभन देखाएर बेच्नको लागि भारत लैजाने  तीन जना पुर्पक्षका लागि आज जेल चलान भएका हुन् ।

अदालतको आदेशपछि पक्राउ परेका मोरङको लेटाङ्ग नगरपालिका-३ घर भई रामधुनी नगरपालिका-५ झुम्कामा बस्ने २२ वर्षीया मनिका ढकाल र सप्तरीको विष्णुपुर गाउँपालिका-५ का २८ वर्षीय सुमितकुमार मण्डल पुर्पक्षको लागि मोरङ कारागार चलान भएका छन् ।

सोही मुद्दाका प्रतिवादी सप्तरीको तिलाढी कौलारी गाउँपालिका १ का नाबालकलाई भने विराटनगरस्थित बाल सुधारगृह पठाइएको छ । उनीहरूले सुनसरीको रामधुनी नगरपालिकाका किशोरीलाई प्रलोभन देखाएर भारत बेच्न लैजान लागेको अवस्थामा विराटनर १७ नेपाल र भारतको सिमा नाका इस्लामपुरबाट असोज ४ गते प्रहरी र साना हातहरु नामक संस्थाले उद्धार गरेको थियो ।

सोही क्रममा पक्राउ परेकामध्ये गिरोहका मुख्य नाईके सुमित रहेको प्रहरीको अनुसन्धानबाट खुलेको छ । बेचिनबाट जोगाएर साना हातहरु नामक संस्थाको सम्पर्कमा आएकी किशोरीलाई भारतमा बली दिन लगिएको आशंका गरिएको थियो ।