नेपाल विद्युत प्राधिकरणमा शाक्यलाई बनाइयो निमित्त सीईओ

२४ कार्तिक, काठमाडौं । कुनै बेला नेपाली जनजीवनको अभिन्न हिस्सा बनेको लोडसेङिलाई एकादेशको कथामा परिणत गर्न सफल कुलमान घिसिङको लोकप्रियताबाट दुईतिहाईको वाम सरकार त्रस्त बन्यो । त्यसैले प्रधानमन्त्री केपी ओलीले घिसिङलाई नेपाल विद्युत प्राधिकरणको कार्यकारी प्रमुखमा दोस्रो कार्यकालका लागि सिफारिश गर्न नै दिएनन् ।

उर्जा मन्त्री वर्षामान पुनले मन्त्रिपरिषदमा घिसिङको कार्यकाल थप्न प्रस्ताव त लगे , तर ओलीले यसबारे कुरै गर्न चाहेनन् । सरकारले सबै काम गर्ने अनि त्यसको जश चाहिं उनले लिने – ओलीको आक्रोश यस्तो थियो ।  त्यसपछि ओलीको चलखेल अर्कैतिर बढ्यो । अब वहुचर्चित अमेरिकन च्यालेञ्ज कर्पाेरेशन अर्थात एमसीसी आयोजनामार्फत विद्युत् प्रशारण लाइन निर्माण गर्न आतुरी छ ।

यसमा उनले राम्रै आर्थिक चलखेल हुने भेउ पाएका छन् । त्यसैले ओली चाहन्थे यो आयोजनाको निर्माण आफ्नै निकट कार्यकारी प्रमुखको खटनपटनमा होस् ।  लामो समय यसका लागि ओलीले गृहकार्य गरे । अन्त्यमा उनी यो कामको जिम्मेवारी आफ्नै सालो नाता पर्ने प्राधिकरणकै उच्च पदस्थ एक कर्मचारीलाई दिने निधोमा पुगे । सोही बमोजिम हितेन्द्रदेव शाक्यलाई आजबाट प्राधिकरणको निमित्त कार्यकारी प्रमुख बनाइएको छ ।

हिजै मात्र उनको काज फिर्ता गरिएको छ । अब उनी सबैभन्दा वरिष्ठ कर्मचारी भएको नाताले निमित्तको जिम्मेवारी दिइएको उर्जा मन्त्रालयले जनाएको छ ।  यसअघि लेखनाथ कोइरालाले उक्त जिम्मेवारी पाएका थिए । कोइराला भन्दा कमिसनको खेल शाक्यमार्फत गर्न सहज हुने सेटिङ मिलाएर ल्याइएको छ । अब उनलाई नै पूर्णकालिन सिइओ बनाउने योजना ओलीको रहेको दाबी मन्त्रालय स्रोतको रहेको छ ।
शाक्यलाई एइए इञ्जिनियरिङ कम्पनीबाट काज फिर्ता गरिएको हो ।