आज उपत्यकामा १४२८ जनालाई कोरोना पुष्टि, १८ संक्रमितको मृत्यु

२४ कार्तिक, काठमाडौं । सोमबार काठमाडौं उपत्यकामा १ हजार ४२८ जनालाई कोरोना पुष्टि भएको छ । स्वास्थ्य तथा जनसंख्या मन्त्रालयका अनुसार देशभर थपिएका २ हजार ५७१ संक्रमितमध्ये १ हजार ४२८ जना काठमाडौं उपत्यकाका छन् ।

उपत्यकामा ६३० महिला र ७९८ पुरुषलाई कोरोना पोजेटिभ देखिएको हो । हाल काठमाडौंमा १५ हजार ९८२,भक्तपुरमा १ हजार १४३ र ललितपुरमा २ हजार २५९ जना सक्रिय संक्रमित छन् ।

हाल सक्रिय संक्रमितको संख्या ३६ हजार १७४ रहेको छ । जसमध्ये ४११ ज्ना आइसियु र ८३ जनाको भेन्टिलेटरमा उपचार भइरहेको छ । यस्तै ९६७ जना क्वारेन्टाइनमा रहेका छन् । २४ घण्टामा ११ हजार १७७ जनाको पीसीआर परीक्षण भयो ।

२४ घण्टामा १ हजार ७९८ जना संक्रमणमुक्त भए । यो सँगै निको हुनेको संख्या १ लाख ५९ हजार ७२४ पुगेको छ । यस्तै १८ संक्रमितको मृत्यु भएको छ । हालसम्म कोरोना संक्रमितको मृत्युको संख्या १ हजार १२६ पुगेको छ ।