आज पनि सचिवालयको अनौपचारिक बैठक बस्दै

२५ कार्तिक, काठमाडौं । भोलिसम्मका लागि सचिवालय बैठक डाक्न दिइएको समयावधिमा प्रधानमन्त्री केपी ओली सहमत भएनन् भने के गर्ने भनेर नेकपाका बहुमत नेता आज फेरि अनौपचारिक बैठक गर्दैछन् । नेकपाका कार्यकारी अध्यक्ष पुष्पकमल दाहाल प्रचण्डले आज बेलुकी ४ बजे पार्टी कार्यालय धुम्बराहीमा सचिवालयको अनौपचारिक बैठक डाकेका छन् ।

गत शुक्रबार र शनिबार पनि यस्तै बैठक गरी नेताहरु प्रधानमन्त्री ओलीलाई भेट्न बालुवाटार पुगेका थिए । ओलीले भने सल्लाह गरेर बैठक डाक्ने भनेका थिए । तर हिजो मात्रै ओलीले महासचिव विष्णु पौडेलमार्फत निवेदनमा तोकआदेश गरी विधान बमोजिम बैठक राख्नू भन्ने फरमान जारी गरेका थिए ।

उक्त खबर लिएर हिजै महासचिव पौडेल प्रचण्डलाई भेट्न खुमलटार पुुगेका थिए । सो अवसरमा पौडेलले विधान बमोजिम १५ दिन भित्र बैठक राख्ने बताएका थिए । तर प्रचण्डले भने अब २४ घण्टा मात्रै म्याद थप गर्ने चेतावनी दिएका थिए । सो बमोजिम आज बेलुकीसम्म ओलीले सचिवालय बैठक डाकेनन् भने भोलि नै बहुमतको औपचारिक बैठक राख्न नेताहरु सहमत देखिएका छन् ।

यही विषयमा छलफल गर्न आज साँझ अनौपचारिक बैठक राखिएको हो– खुमलटार निकट स्रोतले भन्यो । प्रचण्डलगायत नेताहरु झलनाथ खनाल, माधवकुमार नेपाल, बामदेव गौतम र नारायणकाजी श्रेष्ठ आज पनि भेला हुँदैछन् ।