पार्टीभित्रको बेथिती छोडेर ओली संखुवासभा जाँदै

२६ कार्तिक, काठमाडौं । नेपाल कम्युनिष्ट पार्टी (नेकपा) भित्र तीब्र असन्तुष्टि बढेको बेला पार्टी अध्यक्षसमेत रहेका प्रधानमन्त्री केपी शर्मा ओली आज संखुवासभा जाने भएका छन् । प्रधानमन्त्री ओली बिहानै त्यसतर्फ प्रस्थान गर्ने कार्यक्रम रहेको छ ।

शारीरिक अस्वस्थताका कारण खासै काठमाडौं बाहिर नगएका प्रधानमन्त्रीको आकस्मिक संखुवासभा भ्रमणबारे विस्तृत रुपमा जानकारी आएको छैन । तर उनले त्यहाँ पुगेर स्थानीय कार्यकर्ता तथा विकास निर्माणको निरीक्षण गर्ने जनाइएको छ ।

मिर्गौला प्रत्यारोपण पछि काठमाडौं बाहिर ननिस्किएका ओलीले पहिलो कार्यक्रम भोटखोला गाउँपालिका–१ किमाथाङ्कामा सक्ने छन् ।

त्यसपछि ओलीले किमाथाङ्कामा सशस्त्र प्रहरीको बोर्डर आउट पोष्ट (बीओपी)को निरीक्षण गर्नेछन् । स्थानीय जनप्रतिनिधि र किमाथाङ्काका बासिन्दासँग छलफल तथा भेटघट गर्ने कार्यक्रम उनको छ ।