स्टार्टअप आइडियामाथि शुन्य ब्याजदरमा कर्जा उपलब्ध गराउन सरकारसँग माग

२६ कार्तिक, काठमाडौं । समृद्धि स्कुल र विशाल फाउण्डेशनको संयुक्त आयोजनामा राजधानीमा सम्पन्न भएको योङ आन्ट्रपर्नस कन्ल्लेभ २०२० मा सहभागी युवा उधमी तथा विद्र्यार्थीहरुले स्टार्टअप आइडियामाथि लगानी बढाउन सरकारसँग माग गरेका छन् ।

गत कार्तिक २० गतेदेखि २५ गतेसम्म सञ्चालन भएको उक्त कार्यक्रममा कन्केलेभ स्टुडियोमार्फत ३ दर्जन अतिथि सहभागी भए भने वेविनारमार्फत १ हजार भन्दा बढी युवा उद्यमी तथा विद्यार्थीहरुले सहभागिता जनाएका थिए । बिभिन्न सेसनहरुमा बोल्दै युवाहरुले आफुहरुको आइडियामाथि सरकारले बिउपुँजी र तालीमको अवसर प्रदान गरे नेपालमै केही गर्ने रहर रहेको बताएका थिए ।

बिभिन्न सेसनमा बोल्ने सरकारका प्रतिनिधि, निजी क्षेत्रका वरिष्ठ उद्यमी र बैकंरहरुले उत्कृष्ट आइडिया भएका स्टार्टअपहरुलाई शुन्य ब्याजदरमा कर्जा सरकारले उपलब्ध गराउन सके भविश्यमा धेरै ठुला ब्यवसायका रुपमा स्टार्टअपहरु बिस्तार हुने बताएका थिए ।

युवा उधमी तथा विद्यार्थीहरुमा केन्द्रित रहको यो कार्यक्रमले युवा विद्यार्थी वर्गलाई उधमशीलतामा लाग्न अभिप्रेरित गरेको तथा अगुवा उधमीहरुको उधम अनुभवबाट उधमशीलताका सम्भावित समस्या र चुनौति तथा प्रक्रियाको बारेमा ज्ञान आर्जन गर्नसक्ने एउटा महत्वपुर्ण अवसर भएको आयोजक संस्था विशाल फाउण्डेशनका अध्यक्ष नरेशप्रसाद श्रेष्ठले बताए ।

त्यसैगरी कोरोना भाइरस महामारीपछि संसारभर आर्थिक पुनरउत्थानको एजेण्डा प्रमुख रुपमा उठ्ने भन्दै फाउण्डेशनका प्रमुख कार्यकारी अधिकृत विशाल गैरेले आगामी दिनमा सरकारले सीप विकास र उत्पादशील क्षेत्रमा सहुलियत कर्जाको ब्यवस्था गनुपर्नेमा जोड दिए ।

पुर्व अर्थमन्त्री सुरेन्द्र पाण्डे, पुर्व अर्थमन्त्री एवं पुर्वसचिव शंकरप्रसाद कोइराला, बागमती प्रदेश सरकारका उद्योग, पर्यटन, वन तथा वातावरण मन्त्री अरुण नेपाल र सामाजिक विकास मन्त्री युवराज दुलाल, राष्ट्रिय योजना आयोगका सदस्य डा. उषा झा, अर्थ मन्त्रालयका प्रमुख आर्थिक सल्लाहकार डा. प्रकाशकुमार श्रेष्ठ, सिटिईभीटी का सदस्य सचिव डा पुष्परमण वाग्ले, प्रधानमन्त्रीका आइटी बिज्ञ अस्गर अली, वरिष्ठ उद्यमी हरिभक्त शर्मा, हेमराज ढकाल, हेमाकुमारी अधिकारी, सुदिप आचार्य, बैंकर मनोज ज्ञवालीलगायतका स्पीकरहरुले कार्यक्रमलाई सम्बोधन गरेका थिए ।

प्रत्येक बर्ष कार्यक्रमलाई निरन्तरता दिने र यस्ता कार्यक्रमले युवा, बिद्यार्थीलाई उद्यमी बन्न अभिप्रेरित गर्ने आयोजकको भनाइ रहेको छ ।