कलंकी दुर्घटनामा प्रहरी अनुसन्धान सुरू, घाइतेकाे उपचार हुँदै

२७ कार्तिक, काठमाडौं । आज बिहान कलंकीस्थित मकालु पेट्रोलपम्प नजिकै भएकाे ट्रक दुर्घटनाबारे प्रहरीले आवश्यक अनुसन्धान थालेकाे छ । कलंकीमा रोकिराखेको ट्रकमा कुखुरा बोकेको गाडी ठक्कर खाएपछि तीन जनाको मृत्यु भएको  थियाे । बिहान करिब ३ः३५ मा भएको दुर्घटनाका घाइतेहरूलाई उपचारका लागि कलंकीस्थित सहिद मेमोरियल अस्पतालमा लगिएकोमा तीन जनाको निधन भएको र एक जना सामान्य घाइते रहेको महानगरीय प्रहरी वृत्त कालिमाटीले जनाएको छ ।

बल्खुबाट सीतापाइलातर्फ जाँदै गरेको बा ५ ख ८८६५ नम्बरको कुखुरा बोक्ने गाडी सडकमा रोकिराखेको बा ३ ख ७५३० नम्बरको ट्रकसँग ठक्कर खाएको थियो।

दुर्घटनामा परेका नुवाकोट सुन्दरदेवी गाउँपालिका घर भएका २४ वर्षिय रोशन तामाङ, नुवाकोट तारकेश्वर गाउँपालिका घर भएका ३७ वर्षका माधव घिमिरे र तारकेश्वरकै २७ वर्षिय भूपेन्द्र तामाङको मृत्यु भएको प्रहरीले जनाएको छ । दुवै सवारी साधनका चालक प्रहरी नियन्त्रणमा रहेका छन् । नुवाकोट तारकेश्वरका २२ वर्षिय विजय तामाङ घाइते छन् । उनको खुट्टामा चोट छ । प्रहरीका अनुसार उनी बोल्न सक्ने अवस्थामा छन् ।