ओली र प्रचण्ड–नेपाल आफ्नै रणनीति बनाउन व्यस्त

२७ कार्तिक, काठमाडौं । अन्ततः प्रधानमन्त्रीसमेत रहेका नेकपाका एक नम्बरी अध्यक्ष केपी ओली सचिवालय बैठक डाक्न सहमत भएका छन् । हिजो संखुवासभा भ्रमण सकेर राजधानी आएलगत्तै ओलीले पार्टी महासचिवसमेत रहेका अर्थमन्त्री विष्णु पौडेललाई डाकेर भोलि शुक्रबार साँझ ४ बजेका लागि सचिवालय बैठक डाक्न निर्देशन दिएका हुन् ।

सोही बमोजिम पौडेलले सबै सचिवालय सदस्यहरुलाई बैठकमा सहभागी हुन खबर गरिसकेका छन् । यसअघि बैठक डाक्ने विषयमा सचिवालयका बहुमत सदस्यले ओलीलाई दबाव दिएपनि ओलीले अस्वीकार गर्दै आएका थिए । २५ गते मंगलबार पनि अर्का अध्यक्ष पुष्पकमल दाहाल प्रचण्डले ओलीलाई भेटर आज बिहीबारसम्म बैठक राख्न आग्रह गरेका थिए । तर ओली दुई अध्यक्षबीच सहमति जुटेपछि मात्रै सचिवालयको औपचारिक बैठक राख्ने पक्षमा थिए ।

विगत लामो समयदेखि ओली र प्रचण्डबीच विवाद चर्किरहेको छ । पूर्व एमाले खेमाकै माधवकुमार नेपाल समूहसँग नजिकिएर प्रचण्डले ओलीमाथि दबाब बढाइरहेका छन् । प्रचण्ड र नेपाल मिल्दा ओली हरेक कमिटीमा अल्पमतमा रहेका छन् । तर उनी बहुमतको निर्णय अस्वीकार गर्ने भन्दै धम्की दिइरहेका छन् ।

अब कसरी बढ्ने ?
ओलीले सचिवालय बैठक डाकेकाले कसरी प्रस्तुत हुने भन्ने सन्दर्भमा प्रचण्ड र नेता नेपाल अन्यौलमा छन् । ओलीले बैठक नडाक्दा कसरी जाने भन्ने विषयमा यसअघि उनीहरुबीच सरसल्लाह भएको थियो । तर ओली बैठक गर्न सहमत भएकाले नयाँ ढंगले प्रस्तुत हुनुपर्ने अवस्था छ । यसबारे प्रचण्डले नेता नेपालसँग फोनमा वार्ता गरेका छन्। उनीहरु निकट नेताहरुका साथ आजै भेटेर छलफल गर्दैछन् । ओलीलाई विगतमा भएका सबै निर्णय फिर्ता गरी आत्मालोचना गराउने र दुई मध्ये एक पद छाड्न बाध्य बनाउने उनीहरुको रणनीति छ ।

ओली मान्ने सम्भावना न्यून
भोलि बस्ने सचिवालय बैठकमा प्रचण्ड र नेपाललगायत बहुमत नेताहरुले ओलीको कार्यशैलीको चर्काे आलोचना गर्ने तयारी गरेका छन् । साथै, पूर्व निणर्य बमोजिम गर्न बाध्य बनाउने भएका छन् । यसका लागि आवश्यक पर्दा स्थायी कमिटी र केन्द्रीय कमिटी बैठकको मितिसमेत तोक्ने तयारी उनीहरुको छ ।

तर प्रधानमन्त्री ओली पक्षले भने बहुमतका आधारमा गरिने कुनैपनि निर्णय आफ्ना लागि अस्वीकार्य रहने बरु त्यसको बदलामा आफूले ठूलै कदम चाल्ने धम्की दिने बुझिएको छ । ओलीले बहुमतको निर्णय नमान्ने भनेकाले प्रचण्ड – नेपाल पक्ष के गर्ने भन्ने अन्योलमा रहेका छन् ।ओलीले बरु सल्लाहबाटै पार्टी विभाजन गर्नेसम्मको कुरा सचिवालय बैठकमासमेत राख्ने स्रोतले बतायो । नेपाली जनताले आफ्नो नाममा बहुमत दिएकाले पाँच वर्ष कसैले कुनै अवरोध गर्न नपाउने उनको तर्क रहने छ ।

ओलीको बेग्लै तयारी
सचिवालय बैठक बस्नुअघि ओली पक्षले पार्टी उपाध्यक्षसमेत रहेका सचिवालय सदस्य बामदेव गौतमलाई फेरि फकाउने प्रयास गर्ने बुझिएको छ । हिजो मात्रै गौतमलाई सर्वाेच्च अदालतले थप संवैधानिक जिम्मेवारी ग्रहण गर्न बाटो खोलिदिएको छ । त्यसपछि प्रधानमन्त्री ओलीले गौतमलाई रक्षासहित उपप्रधानमन्त्री बनाउने आश्वासन दिने बुझिएको छ । गौतमलाई साथ लिन सक्दा सचिवालयमा ओली बहुमतमा पुग्ने अवस्था रहेको छ ।

यसपटक वार की पार
पार्टी भित्र ओलीको कार्यशैली निरंकुश बनेको भन्दै शीर्ष नेताहरुले लामै समयदेखि दुखेसो गर्दै आएका हुन् । तर त्यसको कुनै असर र प्रभाव ओलीमा परेको छैन । बरु उल्टो नेताहरुको मानमर्दन गर्न उनी बुर्कुशी मार्छन् । धेरैपटक ओलीको मूर्खताप्रति आजित भएपनि नरम दृष्टि राख्ने प्रचण्ड अब भने टालटुले सम्झौता वा सहमति नगर्ने पक्षमा अडिग छन् । निकट नेताहरुसँग उनले अब ओलीका गुलिया र मीठा आश्वासनप्रति नलोभिने अठोट गरेका छन् । जस्तोसुकै अवस्थामा पनि ओलीसँग वार की पारको लडाईं गर्ने पक्षमा उनी रहेका छन् ।

यसबारे प्रचण्डले नेता नेपाललाई समेत प्रष्ट पारिसकेको अवस्था छ । ओलीले बामदेवलाई फकाउन सक्ने सम्भावनाबारे पनि प्रचण्ड र नेपाल सचेत देखिएका छन् । अस्थिर स्वभाव भएका गौतम फकिएको अवस्थामा ओली फेरि हावी हुनसक्नेतर्फ उनीहरु गम्भिर बनेका छन् । त्यसैले हरेक बैठक वा छलफलमा बामदेवलाई साथै राख्ने उनीहरुको रणनीति रहेको छ ।

अब राजीनामा नै माग्ने
प्रचण्ड – नेपाल समूहले पछिल्लो पटक प्रधानमन्त्री ओलीको राजीनामा मागेको अवस्था छैन । केवल बैठकमार्फत छलफल गरौं मात्र भनेका छन् । तर ओली जहिलेपनि आफू कुनै हालतमा राजीनामा नगर्ने बताउँदैछन् । त्यसैले अबको बैठकमा चाहिं प्रचण्ड र नेता नेपालले राजीनामा दिन नै माग गर्ने भएका छन् । यस्तो अवस्था आएमा ओलीले पनि प्रतिकार गर्ने छन् । जसले गर्दा नेकपा औपचारिक रुपमै फुटको दिशामा अग्रसर हुनेछ ।