कसका लागि बन्यो बालुवाटारमा हेलिप्याड ?

२७ कार्तिक, काठमाडौं । बालुवाटारमा हेलिप्याड निर्माण भएको छ । प्रधानमन्त्रीको आकस्मिक र विशेष उडानका लागि बालुवाटारमै हेलिप्याड निर्माण गरिएको हो ।

नागरिक उड्डयन प्राधिकरणको मापदण्डअनुसार नै हेलिप्याड निर्माण भएको र यसले बालुवाटारबाट विमानस्थल आउजाउ गर्ने क्रममा ट्राफिक जामको समस्या नहुने नेपाली सेनाले जनाएको छ ।

यो हेलिप्याड नेपाल नागरिक उड्डयन प्राधिकरणसँगको प्राविधिक सहयोगमा नेपाल आर्मीले नै तयार पारेको हो । प्राधिकरणका उपमहानिर्देशक राजकुमार क्षेत्रीका अनुसार हेलिप्याडका लागि आवश्यक प्राविधिक सहयोग प्राधिकरणले गरेको हो । तर, निर्माणको सम्पूर्ण जिम्मा भने नेपाली सेनाले लिएको थियो ।

अब बालुवाटारमै हेलिप्याड निर्माण भएपछि प्रधानमन्त्री ओलीको उडान पनि बढ्ने अनुमान गरिएको छ ।