बुटवल अस्पतालका डाक्टरको सामूहिक राजीनामा

२७ कार्तिक, बुटवल । बुटवलको कोरोना विशेष अस्थायी अस्पतालका डाक्टरले सामूहिक राजीनामा दिएका छन् । कोरोना महामारीका बेला उपचार गर्दा जोखिम भत्ता नपाएको भन्दै डाक्टरहरुले सामूहिक राजीनामा दिएका हुन् ।

लुम्बिनी प्रादेशिक अस्पतालले सात जना मेडिकल अफिसरलाई गत साउनदेखि करार सेवामा नियुक्त गरेको थियो। तर सातै जना चिकित्सक कोरोना जोखिम भत्ता नपाएको भन्दै बुधबारदेखि सेवामा नफर्केर राजीनामा दिएका हुन् । अस्पतालमा कार्यरत कन्सल्टेन्ट र नर्सिङ स्टाफहरू खटाएर भए पनि अस्पतालमा सेवा प्रदान गरिएको छ।

लुम्बिनी प्रादेशिक अस्पतालका प्रमुख मेडिकल सुपरिटेन्डेन्ट डा. राजेन्द्र खनालले सातै जना चिकित्सकले कोरोना जोखिमभत्ता नपाए सेवामा नआउने भन्दै मंगलबार मात्रै अल्टिमेटम दिएको र बुधबारदेखि नै काममा नआएको बताए। यसअघि कोरोना महामारीमा काम गरेको जोखिम भत्ता नपाएको भन्दै वीर अस्पतालका चिकित्सकले पनि सामूहिक राजीनामा दिएका थिए ।