नेकपाभित्र ओली र प्रचण्डको ताण्डव !

२८ कार्तिक, काठमाडौं । सत्तारुढ नेकपाभित्रको नेतृत्व विवादले अध्यक्षद्धय केपी शर्मा ओली र पुष्पकमल दाहाल प्रचण्डबीच चर्को रस्साकस्सी चलेको छ । नेकपाभित्रको आन्तरिक किचलोसँगै दुई अध्यक्षबीच आरोप प्रत्यारोप चलेको हो ।

प्रधानमन्त्री ओलीले प्रचण्डलाई पत्र नै लेखेर खुमलटारबाट पार्टी चलाउन खोजेको आरोप लगाएका छन् । उनले पार्टी सचिवालय खुमलटारमा बसेर चलाउन खोजेको भन्दै सरकारलाई अनावश्यक हस्तक्षेप गर्ने कामले गर्दा विवाद निम्तिएको पनि आरोप लगाएका छन् ।

यस्तै प्रचण्डले पनि ओलीलाई मुखमा अमृत देखाएर घडामा विष राखेको आरोप लगाएका छन् । पार्टीभित्र सामान्तवाद लागु गर्न खोजेको भन्दै प्रचण्डले ओलीको कडा शब्दमा आलोचना गरेका छन् । दुवै अध्यक्षले एक अर्कालाई पत्र लेखेर आरोप प्रत्यारोप गरेर विवाद झन उत्कर्षमा पुगेको सकेत दिएका छन् ।

शुक्रबार बसेको सचिवालय बैठकमा पनि विवादका विषयमा छलफल हुनुको साटो एक अर्कोलाई घोचपेच गर्ने श्रृङ्खला चलेको थियो । एक अर्काप्रति तिखा आरोप लगाउने क्रम बढेपछि बैठक मंसिर ३ गतेसम्मका लागि स्थगित गरिएको छ ।