साझा र विवेकशील पार्टी एकता नजिक !

२ मंसिर, काठमाडौं । विवेकशील नेपाली र साझा पार्टीबीच एकता हुने सम्भावना बढेको छ । विवेकशीलका दुई तिहाई सदस्यले एकताका लागि सहमति दिएपछि दुई पार्टीबीच एकता हुने सम्भावना बढेको हो ।

विवेकशीलले २६ र २७ कात्तिकमा एसएमएस र ईमेलबाट गरेको मतदानका क्रममा दुई तिहाइ सदस्यले साझासँग एकीकरण गर्न नेतृत्वलाई स्वीकृति दिएका हुन् । तर, पार्टी एकीकरण भने राजनीतिक संवाद समितिले तयार पारेको संयुक्त प्रतिवेदन अनुसार हुनुपर्नेछ ।

विवेकशील नेपाली दलको विधानअनुरूप सहभागितामूलक लोकतन्त्रको व्यवहारिक अभ्यास गर्दै साझा पार्टीसँग एकीकरणसम्बन्धी प्रस्तावमा मतसंग्रहका लागि मतदान गरिएको थियो ।

शीर्ष नेताहरू मात्र मिलेर पार्टी एकीकरण गर्ने प्रचलनलाई तोड्दै विवेकशील नेपाली दलले आम सदस्यहरूको मतमार्फत एकीकरणको निर्णय गरेको दाबी गरेको छ । अब साझाको केन्द्रिय समितिले स्वीकृति दिएपछि दुई पार्टीबीच एकता हुनेछ ।

यसअघि दुई पार्टीबीच एकता भएपनि केही समयमै टुटेको थियो । पार्टीमा विग्रह आउँदा झन ठूलो जनमत गुम्ने भएपछि दुई पार्टीबीच एकता हुन लागेको हो ।