१२ प्रतिशत शेयर सर्वसाधारणलाई दिने चन्द्रागिरी हिल्सको तयारी

४ मंसिर, काठमाडौं । पर्यटन व्यवसायमा लगानी गरेको चन्द्रागिरी हिल्स लिमिटेडले नियामक निकाय धितोपत्र बोर्डबाट साढे १८ करोड रुपैयाँ बराबरको प्राथमिक शेयर (आईपीओ) जारी गर्न अनुमति पाएको छ । आईपीओ निप्काशनको अनुमति पाएसँगै १२ प्रतिशत शेयर सर्वसाधारणलाई दिने चन्द्रागिरी हिल्सको तयारी सुरु भएको छ ।

१८ करोड ४० लाख ९१ हजार बराबरको १८ लाख ४० हजार ९१० कित्ता शेयर निष्काशन गर्न बोर्डले कार्तिक २८ गते अनुमति दिएको छ । काठमाडौंको चन्द्रागिरिमा केवलकार तथा होटल व्यवसाय संचालन गरेको कम्पनीले स्थानीय र सर्वसाधारणको लागि प्रतिशेयर १०० रुपैयाँ अंकित दरमा जारी पूँजीको १२ प्रतिशत बराबरको शेयर निष्काशन गर्ने भएको छ ।

कम्पनीको शेयर बिक्रि प्रबन्धकमा ग्लोबल आईएमई क्यापिटल रहेको छ । अब कम्पनीले शेयर निष्काशनको मिति तोकेर आह्वानपत्र प्रकाशन ल्याउनेछ । कम्पनीले आईपिओ निष्काशनको अनुमति माग गर्दै गत जेठ २५ गते नेपाल धितोपत्र बोर्डमा आवेदन दिएको थियो ।