उद्योग वाणिज्य महासंघको चुनाव : किशोर प्रधान बलियो कि चन्द्र ढकाल ?

५ मंसिर, काठमाडौं । नेपाल उद्योग वाणिज्य महासंघको नयाँ नेतृत्वका लागि चुनाव हुँदैछ । चुनावमा वरिष्ठ उपाध्यक्ष पदका लागि कडा प्रतिष्पर्धा हुँदैछ । चन्द्र ढकाल र किशोर प्रधानले प्यानल बनाएर चुनावी दौड शुरु गरेका छन् ।

गएको चैतमा हुनुपर्ने साधारणसभा कोरोनाका कारण सरेपछि मंसिरमा हुन लागेको हो । दुवै पदका उम्मेद्वारले आफूले जित्ने दाबी गर्दै आएका छन् । वरिष्ठ उपाध्यक्ष नै स्वतः अध्यक्ष बन्ने व्यवस्था अनुसार शेखर गोल्छा महासंघको आगामी अध्यक्ष बन्नेछन् । बाँकी सबै पदका लागि चुनाव हुने भएपनि उनले वरिष्ठ उपाध्यक्ष पदका उम्मेद्वार किशोर प्रधानलाई समर्थन गरेका छन् ।

प्रदेश १ का तर्फबाट उम्मेदवारी दिएका राजेन्द्र राउत र द्विराष्ट्रिय उद्योग वाणिज्य संघका तर्फबाट केन्द्रीय सदस्यमा उम्मेदवारी दिएका सन्दीप अग्रवाल निर्विराेध भइसकेका छन् । उनीहरु दुवैले चन्द्र ढकाल समूहबाट उम्मेदवारी दिएका थिए । यसले चुनावको माहोल थप तताएको छ ।

जिल्ला नगर उपाध्यक्ष रहेका प्रधानले आगामी अध्यक्ष शेखर गोल्छा र निवर्तमान अध्यक्ष पशुपति मुरारकाको समर्थन पाएकाले जीत हासिल गर्ने दाबी गरेका छन् । तर चन्द्र ढकालप्रति धेरै व्यवसायीको समर्थन रहेका दावीले यसपटकको चुनाव झन रोचक हुने अनुमान छ ।

पछिल्लो समर्थन हेर्दा किशोर प्रधानलाई पूर्व अध्यक्षहरुको पनि समर्थन छ । पशुपति मुरारकाले समर्थन गर्दा भावी अध्यक्ष बन्न लागेका शेखर गोल्छाको पनि समर्थन छ । यस्तो अवस्थामा चन्द्र ढकाल समूह कति टिक्ला भन्ने पनि मत छ ।

तर प्रदेशको समर्थन हेर्दा किशोरभन्दा चन्द्र अगाडी देखिएको दाबी गरिएको छ । ढकाललाई लूम्बिनी, गण्डकी, कर्णाली र सुदुरपश्चिम प्रदेशको समर्थन रहेको दाबी उनको समूहले गरेको छ । किशोर प्रधान समूहले पनि लूम्बिनी, गण्डकी, कर्णाली र सुदुरपश्चिम, प्रदेश १, प्रदेश २ र बाग्मती प्रदेशका व्यवसायीले समर्थन गरेका देखिएको छ ।

तर चुनाव आउन अझै केही हप्ता बाँकी रहेकाले चुनाव कसले जित्छ भन्ने अहिल्यै एकिन छैन् । भावी अध्यक्ष गोल्छा र पूर्व अध्यक्ष ढकाल समूहमा लागेकाले उनले चुनाव जित्ने सम्भावना नकार्न सकिदैन ।