सभापति देउवा र प्रधानमन्त्री ओलीबीच भेटवार्ता

६ मंसिर, काठमाडौं । नेपाली कांग्रेसका सभापति शेरबहादुर देउवा र प्रधानमन्त्री केपी ओलीबीच शनिबार दिउँसो भेटवार्ता भएको छ । प्रधानमन्त्री निवास बालुवाटारमा देउवा र ओलीबीच करिव सवा ३ घण्टा लामो छलफल भएको हो ।

भेटमा कांग्रेसको तर्फबाट देउवा, रमेश लेखक थिए भने बालुवाटारको तर्फबाट उपप्रधानमन्त्री ईश्वर पोखरेल,संसदीय दलका उपनेता सुवास नेम्वाङ्ग,परराष्ट्रमन्त्री प्रदीप ज्ञवाली,स्वास्थ्यमन्त्री भानुभक्त ढकाल सामेल भएको बताइएको छ । साँझ प्रधानमन्त्रीसँग नेकपा महासचिव तथा अर्थमन्त्री विष्णु पौडेलले समेत भेट गरेका छन् ।

देउवासँग हिजो शुक्रबार भारतीय राजदूत विनयमोहन क्वात्राले बूढानीलकण्ठमा भेटेको भोलिपल्ट बालुवाटारमा प्रधानमन्त्री तथा नेकपा अध्यक्ष ओली र नेका सभापति देउवाबीचको भेटलाई अर्थपूर्ण ढंगले हेरिएको छ ।

उता,मनमोहन सिंह भारतीय प्रधानमन्त्री हुँदा सीधै उतै रिपोर्टिङ गर्ने कांग्रेस सांसद अमरेशकुमार सिंहले पनि दौडधुप र भेटघाटलाई तीव्रता दिएका छन् । उनले शनिबार बिहान नेकपाका कार्यकारी अध्यक्ष पुष्पकमल दाहाल प्रचण्ड र त्यसपछि वरिष्ठ नेता माधवकुमार नेपालसँग उनीहरूकै निवासमा भेटी सूचना लिन खोजेका थिए ।