ओली देउवाबीच गोप्य वार्ता

७ मंसिर, काठमाडौं । प्रधानमन्त्रीसमेत रहेका नेकपा अध्यक्ष केपी ओली आफ्नो राजनीतिक भविष्य नै संकटमा पर्न थालेको आंकलन गरी असन्तुष्ट नेताहरुसँग निर्णायक युद्ध लड्ने पक्षमा देखिएका छन् । पार्टी संगठनमा बहुमतको लौरो चलाएर आफूविरुद्ध मोर्चाबन्दी गरेको भन्दै ओलीले अर्का अध्यक्ष पुष्पकमल दाहाल ‘प्रचण्ड’ र नेता माधवकुमार नेपालसँग वार की पारको लडाईं गर्ने तयारी गरेका हुन् ।

सचिवालय बैठकमा कार्यकारी अध्यक्ष प्रचण्डले १९ पृष्ठमा आरोप मात्र लगाएको भन्दै त्यसको जवाफ शब्द शब्दमा दिने गरी ओलीले १० दिने म्याद पाएका छन् । प्रचण्डलगायत माधव नेपालहरुलाई इँटका जवाफ पत्थर से भने झैं दिने मनस्थितिमा रहेका ओलीले पार्टी विभाजनकै अवस्था आउँदासमेत नछाड्ने मनस्थिति बनाएका छन् ।

त्यसको आंकलन गर्न उनले सबै अप्सन एकैपटक खुला गरेका छन् । सकेसम्म प्रचण्डलाई फकाएर प्रतिबेदन फिर्ता गराउने, नभए संसदीय दलमा बहुमत सिद्ध गर्ने, त्यो पनि संभव भएन भने दल विभाजन गरेर प्रमुख प्रतिपक्षी नेपाली कांग्रेससँग मिलेर चुनावमा जाने उनको रणनीति रहेको छ । सोही बमोजिम हिजो साँझ ओलीले प्रतिपक्षी दलका सभापति शेरबहादुर देउवासँग बालुवाटारमा छलफल गरेका छन् । सत्ता साझेदारी गर्ने अवस्था आयो भने देउवाले साथ दिने नदिने भनेर नाडी छाम्नकै लागि हिजो ओलीले देउवालाई बोलाएको बताइन्छ ।

हिजो साँझ भएको भेटमा ओलीले सोझै सत्ता साझेदारीको प्रस्ताव त गरेनन् तर पार्टी संकटमा भएकाले सरकारले प्रतिपक्षीको सहयोग खोजेको र भविष्यमा समेत अझै मजबूत सम्बन्ध बनाउनुपर्ने अवस्थाबारे चित्रण गरेका थिए । सत्तासँग निकट सम्बन्ध राख्न रुचाउने देउवाले समेत ओलीको भनाइलाई सकारात्मक रुपमा लिएको र समयक्रममा आवश्यक सहकार्य गर्ने विश्वास दिलाएका छन् ।

नेकपा भित्र विवाद चर्किरहेका बेला देउवालाई राष्ट्रपति विद्यादेवी भण्डारीले समेत गत साता शीतलनिवास बोलाएर छलफल गरेकी थिइन् । यो सबै ओलीका लागि संभावित संकट टार्ने पूर्व तयारी रहेको धेरैले अनुमान गरेका छन् । प्रधानमन्त्री ओली यतिबेला सबै संभावनाबारे सचेत भएर लागिरहेको देखिन्छ– बालुवाटार निकट स्रोतले भन्यो । देशैभरिका जिल्ला कमिटीमा आफ्नो पकड र पहच कस्तो छ भनेर परीक्षण गर्ने कामसमेत ओली पक्षले गर्न थालेको बुझिएको छ ।

सकेसम्म पार्टी कब्जा गर्ने नसके फुटाएरै भएपनि आम निर्वाचनमा जाने उनको दाउ रहेको बुझिन्छ – नेकपा निकट एक केन्द्रीय सदस्यले भने । तर परिस्थिति हेर्दा ओलीले चाहे जस्तो भने देखिंदैन । अर्का अध्यक्ष पुष्पकमद दाहाल प्रचण्ड र नेता माधवकुमार नेपाल पक्षको पकड सबै तहमा ओलीको भन्दा मजबूत छ ।

त्यसैले केही नलाग्दा कांग्रेससँग मिलेर सरकार गठन गर्ने र संसद् विघटन गरी चुनावमा आफ्नो वर्चश्व कायम गर्ने दाउ ओलीको रहेको ती सदस्यले बताए ।  तर देउवाको एकल चाहनाले मात्रै ओलीसँग सहकार्य गर्ने अवस्था अहिले सहज छैन । किनभने आफ्नै विवादमा अल्झिएको कांग्रेसको पहिलो प्राथमिकता यतिबेला १४ औं महाधिवेशन हो । महाधिवेशन अगाडि अर्काे अजेण्डामा प्रवेश गर्न कांग्रेसलाई सजिलो छैन ।