ओलीको सत्तामा जानु कांग्रेसको आत्महत्या : नेता अर्जुननरसिंह केसी

७ मंसिर, काठमाडौं । नेपाली कांग्रेसका नेता तथा पूर्वमन्त्री अर्जुननरसिंह केसीले प्रधानमन्त्री केपी शर्मा ओली नेतृत्वको सरकारमा जानु कांग्रेसले आत्महत्या गर्नु सरह भएको टिप्पणी गरेका छन् ।

सामाजिक सञ्जाल ट्वीटमा ट्वीट गर्दै नेता केसीेले जनताबाट तिरस्कृत भइसकेका प्रधानमन्त्री ओलीसँग सत्ता साझेदार गर्नु कांग्रेसका लागि अपमान हुने टिप्पणी गरेका हुन् । ‘ओलीले कांग्रेससँग संयुक्त सरकारको प्रस्ताव राखेको हल्ला छ । स्थिरता, समृद्धि र स्वर्ग लाने भ्रम छरेर आएको, भ्रष्टाचारमा चुर्लुम्म डुबेकासँग, फोहोरको भारी बोक्न यसमा संलग्न हुनु वा सत्तामा जाने हतार गर्नु नेपाली कांग्रेसका लागि आत्महत्या हुनेछ ।’

पछिल्लो समय सत्ता साझेदारीका विषयमा प्रधानमन्त्री ओली र कांग्रेस सभापति शेरबहादुर देउवाबीच छलफल बढ्दो छ । तर पनि कुरा मिल्न सकेको छैन् । यसअघि हिजो मात्रै उनीहरुबीचमा लामै छलफल भएको थियो । नेकपा फुटाएर कांग्रेससँग मिलेर सरकार बनाउने र प्रधानमन्त्रीमा टिकिराख्ने योजना ओलीको छ ।