अत्तालिएका ओली

८ मंसिर, काठमाडौं । प्रधानमन्त्री केपी ओलीको तनाब बढ्दो छ । मंसिर ३ गते बसेको सचिवालय बैठकमा अर्का अध्यक्ष पुष्पकमल दाहाल ‘प्रचण्ड’ले ओलीविरुद्ध १९ पन्ने प्रस्ताव पेश गरेपछि उनको मथिंगल खल्बलिएको छ । पार्टीमा आफूविरुद्ध लागेका प्रचण्डलगायत पाँच शीर्ष नेतालाई बाल नगन्ने ओली प्रवृत्तिले निम्त्याएको बबाल विस्तारै झाँग्गिदै गएको छ ।

ओलीले प्रचण्डको चुनौती सामना गर्ने भन्दै हरेक आरोपको जवाफ दिने भन्दै १० दिने म्याद लिएका छन् । उक्त म्याद आउने १३ मंसिरमा पूरा हुँदैछ । ओलीले अहिले दोहाेरो खेल खेल्दैछन् । एकातिर प्रचण्डलगायत बहुमत सचिवालय सदस्यको सहमतिमा आएको आरोपपत्रको जवाफ दिने पनि भन्दैछन् अर्कातिर प्रचण्डलाई प्रस्ताव फिर्ता लिन दबाब समेत दिइरहेका छन् । तर प्रचण्डले कुनै हालतमा प्रस्ताव फिर्ता नलिने अडान लिएका छन् ।

ओलीका दूतहरुलाई उनले सिधा भाषामा यसो भनेका छैनन् ,तर निकट नेताहरुलाई उनले प्रष्टै भनेका छन्– प्रस्ताव फिर्ता लिनु भनेको मृत्युपत्रमा हस्ताक्षर गर्नु जस्तै हो । प्रचण्डले कुनै हालतमा प्रस्ताव फिर्ता नलिने अडान लिएपछि ओलीको तनाब थपिएको छ । मन बहलाउन उनी आज बिहान एक्कासी पूर्वी पहाडी जिल्ला ताप्लेजुङ हान्निएका छन् ।

विशेष कार्यक्रम केही छैन, मात्र तनाब घटाउन उनी उक्लिएका हुन् । तर प्रचण्डले प्रस्ताव फिर्ता नलिने अडानलाई निस्तेज पार्न ओलीले फेरि अर्काे चाल चलेका छन् । नेपालका लागि चिनियाँ राजदूत होउ यान्छीलाई खुमलटार पठाएका छन् ।

आज बिहान आफू ताप्लेजुङतिर हान्निए लगत्तै उनले यान्छीलाई प्रचण्ड निवास पठाएका हुन् । यान्छीले आज बिहान प्रचण्डसँग भेटेर प्रस्ताव फिर्ता लिन आग्रह गरेको स्रोतको भनाई छ । तर प्रचण्डले आफू एक्लै यस्तो निर्णय गर्न सक्ने अवस्थामा नरहेकाले सल्लाह गर्ने वचन दिएका थिए ।

उता, ओलीले प्रचण्ड र अर्का नेता माधवकुमार नेपाललाई धम्क्याउन गत शनिबार प्रमुख प्रतिपक्षी दल नेपाली कांग्रेसका सभापति शेरबहादुर देउवासँग गोप्य भेट गरेका छन् । भेटका बेला दीर्घकालिन सहयात्राको प्रस्ताव ओलीले राखेको स्रोतहरुले दाबी गरेका छन् । ओलीको अस्थिर मनस्थितिले यसै गर्लान् भन्ने अन्दाज गर्न गाह्रो छ ।

तर उनको पहिलो प्रयास चाहिं प्रचण्डलाई प्रस्ताव फिर्ता लिन लगाउनमै केन्द्रित देखिएको छ । उक्त मनसुवा पूरा नहुँदा ओलीले दोस्रो विकल्पका रुपमा संसदीय दलमा बहुमत सिद्ध गर्ने प्रयास गर्नेछन् । त्यो पनि सम्भव भएन भने चाहिं उनले संसद विघटन वा दल विभाजन गरी कांग्रेसको समर्थनमा चुनाव गराउने खेल खेल्ने तयारी गरेको जानकारहरुको अनुमान रहेको छ ।