सप्तरी राप्रपा संयोजकमा साह सर्वसम्मत चयन

◊ धीरुभाइ

८ मंसिर सप्तरी । राष्ट्रिय प्रजातन्त्र पार्टी एकिकरण भएको झण्डै एक वर्षपछि जिल्लामा एकिकरण समायोजन प्रक्रिया अगाडि बढाएको छ ।
यसैक्रममा सप्तरीको संयोजकमा उम्मदेश्वरप्रसाद साह र सह संयोजकमा बिनोद पाण्डेलाई सर्वसम्मत चयन गरेको छ । साह तत्कालीन राप्रपा (संयुक्त) अध्यक्ष थिए भने पाण्डे राप्रपाका अध्यक्ष थिए ।

एकिकरण भएका राप्रपा र राप्रपा संयुक्तका पदाधिकारीको एक संयुक्त बैठकले जिल्ला नेतृत्वको जिम्मेवारीमा साह र पाण्डेलाई सर्वसम्मत चयन गरी अन्य पदाधिकारीको लागि छलफल अगाडि बढाएको छ । यस्तै, बैठकले छ जनालाई केन्द्रीय संदस्यको लागि सिफारिस गरिएको छ । बैठकले मिना राणा , माहामायाप्रसाद सिंह, सुभाषचन्द्र झा, बलराम चौधरी, रेणु साह, ललितादेबी मंडललाई केन्द्रीय सदस्यका लागि सिफारिस गरिएको संयोजक साहले जनकारी दिए ।

पशुपति शम्सेर राणाको नेतृत्वको राप्रपा(प्रजातान्त्रिक) र डा. प्रकाशचन्द्र लोहनीको नेतृत्वको राप्रपा(राष्ट्रवादी) २०७५ माघ १६ मा एकिकरण भई राप्रपा (संयुक्त) नामाकरण गरिएको थियो । त्यसपछि २०७६ फागुन १८ गते राप्रपा (संयुक्त) र कमल थापा नेतृत्वको राप्रपा एककिरण भई राप्रपा नामाकरण गरिएको छ । एकिकरणपछि राणा, लोहनी र थापाले संयुक्त रुपमा नेतृत्व सम्हाल्दै आएका राप्रपाको चिन्ह गाई र चुनाव चिन्ह हलो रहेको छ ।