मनकामना बजार खुल्यो, खुलेन केवलकार ! सञ्चालन गर्न स्थानीयको माग

८ मंसिर, गोरखा । कोरोना महामारीका कारण करिब आठ महिनादेखि बन्द रहेको मनकामना बजार खुलेपनि कोभिड–१९ का कारण गत चैत्र ८ गतेबाट केवलकार बन्द रहदै आएको छ ।

 लामोसम्म केवलकार बन्द भएको भन्दै स्थानीयले मंसिर १५ गतेभित्रै संचालनको माग गर्दै आइतबार वडा कार्यालयमा निवदेन बुझाइएका छन् । स्थानीयले केवलकार सञ्चालक मनकामना दर्शन प्रालिलाई पनि आफूहरुले अनुरोध गरिसकेका बताएका छन् ।

उद्योग वाणिज्य संघ मनकामना बजार इकाइको पहलमा आइतबार जनप्रतिनिधि, राजनीतिक दल, व्यापारी, संघसंस्थालगायतका सरोकारवालाहरुको बैठक बसेको थियो । बैठकमा अधिकांशले केवलकार सञ्चालन गर्न सहमत देखिएको स्थानीय दिनेश जोशीले बताए ।

यता स्थानीय सहमत भए आफूहरु पनि संचालन गर्न तयार रहेको मनकामना दर्शन प्रालिका नायव प्रबन्धक उज्वल शेरचनले बताएका छन ।