नेकपा विभाजन निश्चित

९ मंसिर, काठमाडौं । सत्ताधारी नेपाल कम्युनिष्ट पार्टीका शीर्ष नेताहरुको कार्यशैली र व्यवहारले अब विभाजन सुनिश्चित भएको संकेत गरेको छ । प्रधानमन्त्रीसमेत रहेका एक नम्बरी अध्यक्ष केपी ओली र अर्का अध्यक्ष पुष्पकमल दाहाल ‘प्रचण्ड’बीच देखिएको मनमुटाव र संवादहिनताले विभाजनको संकेत गरेको हो ।

पार्टी संगठनमा ओली सबैतिर अल्पमतमा छन्, तर उनी त्यसलाई मान्न तयार छैनन् । यही मंसिर ३ गते ओलीले सचिवालय बैठकमा प्रष्टै भने– यहाँ बहुमत र अल्पमतको कुरा गरिन्छ, तर त्यसको परीक्षण भएको छैन् । त्यसैले निर्क्याैल नभएसम्म म त्यसलाई मान्न तयार छैन् ।

गएको कार्तिक २८ गते बसेको सचिवालय बैठकमा अध्यक्ष प्रचण्डले प्रस्तुत गरेको १९ पृष्ठको प्रतिवेदनले ओलीको मन भाँच्चिएको छ ।त्यसलाई काउन्टर गर्न ओलीले मंसिर ३ गते १० दिने म्याद लिएका छन् । तर प्रचण्डलाई प्रस्ताव फिर्ता लिन दबाब सिर्जनासमेत गरिरहेका छन् । प्रचण्ड भने अब प्रस्ताव फिर्ता नहुने भन्दै बरु ओलीको जवाफ आएपछि नयाँ सहमतिको लागि पहल गर्ने बताउने गरेका छन् ।

प्रचण्डले प्रस्ताव फिर्ता नलिए उनलाई पार्टीबाट निकाल्ने ओलीको दाउ छ । त्यसका लागि उनले पूर्व एमाले पक्षलाई एकाकार गर्नुपर्ने हुन्छ । ओलीको टीमले त्यसको प्रयास गरिरहेको छ । तर नेता माधवकुमार नेपाल भने अहिले प्रचण्डलाई लघार्दा भोलि आफ्नो हालत अझै निरीह बनाइने भन्दै ओलीको प्रस्तावलाई अस्वीकार गरिरहेका छन् । तर कतिपय विषयमा प्रचण्ड र नेता नेपालबीच असहमति देखिएको छ । त्यसलाई मलजल गर्न पाए आफ्नो अभिष्ट पूरा हुने मनसुवा ओली पक्षको रहेको छ । तर नेता नेपाल त्यसमा बढो चनाखो देखिएका छन् ।

प्रचण्डप्रति नेपाल क्रुद्ध

कात्तिक २८ गते सचिवालयमा पेश भएको प्रचण्डको राजनीतिक प्रतिवेदन अहिले पार्टीका तल्ला निकायमा समेत पठाइएको छ । प्रचण्डले हिजो दिउँसो प्रतिवेदन प्रिन्ट गरेर तल्लो तहमा पठाएपछि नेता नेपाल बिच्किएका छन् । उनले आफूसँग छलफल नै नगरी एकल रुपमा यसरी प्रतिवेदन तल्लो निकायमा छलफलका लागि पठाउँदा विभाजनका लागि बल पुग्ने भन्दै तत्काल सच्याउन आग्रह गरेका छन् ।

प्रचण्डले समेत यसमा आफ्नो तर्फबाट कमजोरी भएको स्वीकार्दै तत्कालै फिर्ता गर्ने प्रतिबद्धता प्रकट गरेका छन् । तर यही विषयलाई लिएर नेता नेपालले ओली पक्षलाई साथ दिने भन्ने चाहिं होइन ।

ओलीको चाहना

प्रधानमन्त्री ओली प्रतिनिधिसभाको बाँकी कार्यकाल भरि आफैं प्रधानमन्त्री रहने पक्षमा छन् । त्यसैका लागि उनले अहिलेसम्म आफ्नो अड्डी छाडेका छैनन् । यद्यपि विगतमा प्रचण्डसँग भएको आलोपालो प्रधानमन्त्री चलाउने सहमति उनका लागि घाँडो बनेको थियो । तर उनले यसमा प्रचण्डलाई चुकाइसकेका छन् । कार्यकारी अध्यक्ष बनाउने भन्दै पाँचै वर्ष प्रधानमन्त्री पद सुनिश्चित गरोका थिए ।

तर अब त्यो अवस्था रहेन । प्रचण्डमार्फत नेता नेपालले सरकारलाई सधैं अस्थिर बनाउन थालेपछि ओली क्रुद्ध भएका हुन् । उनी कुनै हालतमा कार्यकारी पद छाड्न तयार छैनन् । त्यसका लागि आवश्यक परे पार्टी विभाजन गर्ने तहसम्मको जोखिम बहन गर्न उनी तत्पर देखिएका छन् । त्यसैले उनले प्रमुख प्रतिपक्षी दल नेपाली कांग्रेसका सभापति शेरबहादुर देउवासँग हिमचिम बढाइरहेका छन् ।

अब वार कि पार नै

पार्टी एकता नभत्कियोस् भनेर दोस्रो तहका नेताहरुको दौडधूप जारी छ । ओली निकट शंकर पोखरेल, सुभाषचन्द्र नेम्बाङ, प्रदीप ज्ञवालीहरु प्रचण्डलाई फकाउन लागिपरेका छन् । यस प्रयोजनका लागि प्रचण्ड निकट नेताहरु हरिबोल गजुरेल, टोपबहादुर रायमाझी , देबेन्द्र पौडेल र चक्रपाणि खनाल लागिपरेका छन् । प्रचण्डसँग प्रस्ताव फिर्ता लिन उनीहरुले आग्रह गरे । तर त्यसका लागि प्रचण्ड तयार छैनन् ।

अहिलेको अवस्थामा प्रस्ताव फिर्ता लिनु भनेको आत्महत्या गर्नु जत्तिकै भएको उनको बुझाई छ । नेता नेपाल पनि अब ओलीसँग सधैं किचकिच किचकिच गर्ने पक्षमा छैनन् । जे हुने हो, वार कि पार नै गरौं भन्नेमा उनी दृढ देखिएका छन् । फलाम तात्तिएका बेला नै घन प्रहार गर्नुपर्छ भन्ने उनको मान्यता हो । विवाद चर्किरहेकाले यसैले छिनोफानो गरोस् भन्ने चाहना नेपालको पनि रहेको छ । त्यसका लागि ओलीको जवाफ कुरिरहेका छन् ।

बामदेव अझै ढुलमुलमा

सचिवालय सदस्य बामदेव गौतम एउटै कित्तामा स्थिर नहुँदा प्रचण्ड – नेपाल पक्ष शशंकित भएको छ । सचिवालय बैठकमा प्रष्टसँग ओलीको विपक्षमा देखिएका उनले बाहिर भने आफू कुनै गुटमा नरहेको बताउने गरेका छन् ।

यसले ओलीलाई नै बल पुगिरहेको छ । त्यसैले बामदेव कतिबेला कुन कित्तामा पुग्ने हुन् भनेर प्रचण्ड र नेपाल डराएका छन् । हुन त बामदेवले आफू ओली विरुद्ध प्रतिवद्ध रहेको भन्दै प्रचण्डलाई ढुक्क हुन आश्वास्त गर्न खोजेका छन् । तैपनि प्रचण्ड भने उनीसँग धेरै भर पर्ने अवस्थामा देखिएका छैनन् ।

बादल अझै खुलेनन्

सचिवालय बैठकमा प्रचण्ड निकट रामबहादुर थापा बादल प्राय केही बोल्दैनन् । उनी दुबै पक्षका गुट भेलामा सहभागी हुन्छन् । जसले गर्दा प्रचण्डलाई हानी पुग्ने गरेको छ । यो अवस्थालाई चिर्न प्रचण्डले गएको शनिबार बादलसँग लामो छलफल गरेका थिए । खुमलटार डाकेर प्रचण्डले बादलसँग आफूलाई खुलेर सहयोग गर्न आग्रह गरे ।

तर बादल भने अझै खुलेनन् । उनले पार्टी एकताका लागि दुबै अध्यक्ष मिल्नुपर्ने मात्र भने । तर ओली विरुद्ध खुलेर आउनेमा उनले बिमति जनाए । बादलको तर्क थियो– ओलीको सरकारमा बसेपछि उनको विरोध गर्नु अनैतिक कार्य हो । त्यसैले ऐन मौकामा मात्रै आफू खुल्ने उनले बताएका थिए । बादलको यही शैलीका कारण ओलीलाई सजिलो भएको छ ।