बलात्कारपछि बालिकाको हत्याले महोत्तरी अशान्त, पूर्व पश्चिम राजमार्ग ठप्प !

९ मंसिर, महोत्तरी । ६ बर्षीया बालिकाको बलात्कारपछि हत्या भएको घटनाको विरोधमा महोत्तरी अशान्त बनेको छ । बलात्कारपछि बालिकाको हत्या आराेप लागेका व्यक्तिको घरमा आगजनी गर्नुका साथै महोत्तरीको सडकमा स्थानीयले टायर बालेर प्रदर्शन गरेका छन् ।

पूर्व पश्चिम राजमार्गमा टायर बालेर विरोध प्रदर्शन गर्दा सडक ठप्प बनेको छ । आइतबार महोत्तरीको बर्दिबास १४ शुभम् बस्तीका सहीद आलमकी ६ वर्षीया छोरी गुलाब साह खातुन बेपत्ता भएकी थिइन्। उनको शव सोमबार राति फेला परेको थियो ।

हत्या गरेर बोरामा राखेर झाडीमा फालेको अवस्थामा बालिकाको शव फेला परेको हो । घर नजिकै रहेको सामुदायिक परिवार कल्याण संघ महोत्तरीको कार्यालयभन्दा पश्चितर्फ अवस्थित विनोद साहको खाली जग्गामा बालिकाको शव भेटिएको प्रहरीले जनाएको छ।

बालिकाको बलात्कार र हत्यामा संलग्न भएको आरोपमा एक युवकलाई प्रहरीले नियन्त्रणमा लिएको छ। गौशाला ५ का २५ वर्षीय अरुणकुमार साहलाई पक्राउ गरिएको डीएसपी चपागाइँले जानकारी दिए । साहले अपराध स्वीकार गरेकाे प्रहरीले जनाएको छ।

स्थानीयको विरोधपछि प्रहरी दबाबमा परेको छ । अभियुक्तलाई पक्राउ गरेर थप कारबाही अघि बढाइएपनि विरोध नरोकिएपछि बाक्लो रुपमा सुरक्षाकर्मी परिचालन गरिएको छ ।