म्यानपावर कम्पनीमा छापा हान्दा भेटियो कुटनीतिक नियोगको गाडी

९ मंसिर, काठमाडौं । वैदेशिक रोजगार विभागले दुई दिनमा तीन वटा म्यानपावर कम्पनीमा छापा मारेको छ। विभागले लैनचोरस्थित होप इन्टरनेसनल, धापासीको एसओएस म्यानपावर र गौरीघाटको डिडी ह्युमन रिसोर्स प्रालिमा छापा मारेको हो।

होप इन्टनेसनलमा मंगलबार, एसओएस र डिडी ह्युमन रिसोर्समा सोमबार छापा मारिएको विभागका महानिर्देशक कुमारप्रसाद दाहालले जानकारी दिए । दाहालका अनुसार होप इन्टरनेसनलमा एउटा कूटनीतिक नियोगको गाडी पनि फेला परेको छ। जसले म्यानपावरभित्रको अवैध धन्दाको नयाँ पोल खुल्ने सम्भावना बढेको छ ।

सो मेनपावर कम्पनीको क्रियाकलापमा दूतावासको संलग्नता पनि रहेको आशंका गरिएको छ। यी तिनै मेनपावर कम्पनीले डिमाण्ड नभइकन अनधिकृत रूपमा खाडी मुलुक कतारका लागि कामदार छनोट गरेको आरोप विभागको छ।

उनका अनुसार यी मेनपावरले करिब २ हजारको संख्यामा नेपालीलाई अन्तर्वार्ता गरेको शंका छ। यसबारे विस्तृत छानबिन भइरहेको छ। ती मेनपावरले कामदार छनोटमा प्रयोग गरेका कागजात विभागले नियन्त्रणमा लिएको छ।

होप इन्टरनेसनलमा छापा मार्ने क्रममा ४५ सिडी ००९ नम्बरको कूटनीतिक नियोगको गाडी फेला परेको थियो। यो गाडी कुनै दूतावासको भएकाले यी कार्यमा दूतावास संलग्न भयो कि भन्ने शंका विभागको छ। विभागले यस विषयमा थप अनुसन्धान शुरु गरिएको जनाएको छ ।