बालिका बलात्कार तथा हत्या प्रकरण : १५ जना सुरक्षाकर्मी घाइते

९ मंसिर, महोत्तरी । बर्दिबास नगरपालिका १४ सुगम बस्ती बस्ने सादिम अलामकी ६ वर्षीया छोरी गुलाप्सा खातुनको आइतबार हत्या भएको विषयलाई लिएर स्थानीयवासीले गरेको आगजनी तथा ढुंगामुढा नियन्त्रणको क्रममा १५ जना सुरक्षाकर्मी घाइते भएका छन् ।

अवस्थालाई नियन्त्रणमा लिन खटिएका प्रहरी नायव उपरीक्षक डीएसपीसहित १५ जना प्रहरी कर्मचारी घाइते भएका हुन् । बालिका हत्याको विषयलाई लिएर उत्तेजित भीडले घरमा आगजनी गरेको, प्रहरी बिट जलाउने प्रयास गरेको थियो ।

प्रहरीले बल प्रयोग गरेर अवस्थालाई नियन्त्रणमा लिन खोज्दा बर्दिबास नगरपालिका १ बस्ने ४५ वर्षीय संजय भन्ने बुद्धि राज न्यौपाने र सोही नगरपालिका ५ बस्ने २६ वर्षीय श्याम कार्की घाइते भएका छन् ।

उनीहरुको महोत्तरीमा उपचारपछि थप उपचारका लागि काठमाडौं लगिएको छ । भीडले ढुङ्गामुढा गर्दा नेपाल प्रहरीतर्फ डीएसपी सहित १२ जना र सशस्त्र प्रहरी बल नेपाल तर्फ ३ जना गरी १५ जना प्रहरी कर्मचारी घाइते भएका छन् ।

स्थानीयको विरोधका कारण केही गाडीमा समेत क्षति पुगेको छ । उनीहरुले गाडीमा ढुंगामुढा गरेका थिए । बालिकालाई बलात्कारपछि हत्या गरेको आरोपमा प्रहरीले २५ बर्षीय अरुण शाहलाई पक्राउ गरेको छ । उनीमाथि थप अनुसन्धान भइरहेको छ ।