बानेश्वरमा बस, ट्रक र कार ठोक्किदा चालक गम्भिर घाइते

१० मंसिर, काठमाडौं । काठमाडौंको नयाँबानेश्वर–शान्तिनगरमा बस, टिपर र कार ठोक्किदा एक जना गम्भिर घाइते भएका छन् । गएराति भएको दुर्घटनामा टिपर चालक गम्भीर घाइते भएका हुन् ।

गएराति करिब साढे १० बजे बा ७ च ८८१७ नम्बरको कार र बा ३ ख ७१५७ नम्बरको मिनी ट्रक बिजुलीबजारतर्फबाट तिनकुनेतर्फ गइरहेका थिए । बानेश्वर चोकबाट करिब २ सय मिटर टाढा शान्तिनगर नजिक ती गाडीहरु विपरीत दिशाबाट आइरहेको बा ३ ख ८३९६ नम्बरको बससँग ठोक्किएका हुन् ।

यो दुर्घटनामा टिपर चालक दोलखाको साविक शैलुंगेश्वर गाविसका ३२ वर्षीय दीपक तामाङ गम्भीर घाइते भएका छन् । उनलाई ट्रमा सेन्टरमा उपचारका लागि भर्ना गरिएको छ ।

कार चालक धुलिखेल बस्ने विनय श्रेष्ठ नयाँबानेश्वर प्रहरी वृत्तको हिरासतमा छन् । बस चालक फरार छन् । दुर्घटनाको खास कारण खुलेको छैन् ।