एक तोला सुनमा युवतीको अस्मिता, बलात्कारपछि मिलापत्र !

१० कार्तिक, धनगढी । कैलालीमा युवतीको अस्मिता एक तोला सुनमा बेचिएको पाइएको छ । युवतीमाथि बलात्कार भएको घटना सार्वजनिक भएपछि एक तोला सुन दिने सत्रमा मिलापत्र भएको पाइएको हो ।

बैतडीको सिगास गाउँपालिकाकी १८ वर्षीया युवतीमाथि असार दोस्रो साता बलात्कार भएको थियो । सिगास गाउँपालिका वडा नं ३ का दीपक सिंह धामीले बलात्कार गरेको पीडित युवितीले बताएकी थिइन् । उनले धारामा पानी भर्न जाँदा आफूमाथि बलात्कार भएको बताएकी थिइन् ।

तर स्थानीय पीडक पक्षले भने एक तोला सुन दिने सत्रमा घटना गाउँमै मिलाउन दबाब दिएका थिए । दबाबपछि गाउँमै घटना मिलाइएपनि अहिले धम्की दिन थालेपछि पीडित पक्ष प्रहरीमा पुगेको हो । प्रहरीमा पुगेको घटना बाहिरिएपछि सामाजिक सञ्जालमा चर्को आलोचना र बहस शुरु भएको छ ।

बैतडीका प्रहरी नायव उपरीक्षक नारायणप्रसाद अधिकारीले दोषीमाथि कारवाही गर्न प्रक्रिया शुरु गरिएको बताए । सरकारले बलात्कार घटनामा मिलापत्र गर्नेलाई ३ बर्षसम्म जेल सजाय तोकेको अध्यादेश जारी गरेको छ ।

मन्त्रिपरिषद बैठकबाट पारित भएको यो अध्यादेश राष्ट्रपतिबाट प्रमाणीकरण हुन बाँकी छ । राष्ट्रपतिबाट प्रमाणीकरण भएपछि मात्रै लागु हुनेछ ।