एसियामै सबैभन्दा भ्रष्ट ओली सरकार

११ मंसिर, काठमाडौं । “म भ्रष्टाचार गर्दिन र अरुलाई गर्नपनि दिन्न” भन्ने नेपालका प्रधानमन्त्री केपी ओलीका यस्ता अभिव्यक्ति हावादारी भएको भन्दै ट्रान्सपरेन्सी इन्टरनेशलले नेपालमा पछिल्लो वर्ष भ्रष्टाचार बढेको प्रतिबेदन सार्वजनिक गरेको छ । ट्रान्सपरेन्सीको उक्त प्रतिबेदनलाई ओली सरकारका अरौटे भरौटेले भने खारेज गर्दै सरकारको लोकप्रियताबाट अत्तालिएको समूहले चलाएको हौवा मात्र भएको टिप्पणी गरेका छन् ।  इन्टरनेशनलले हिजो जारी गरेको प्रतिवेदनमा नेपाल एसियामै सबैभन्दा भ्रष्ट देश भएको उल्लेख छ ।

ग्लोबल करप्सन व्यारोमिटर एसिया प्रतिबेदनमा भनिएको छ– एसियाका १७ मुलुकका जनतासँग गरिएको मत सर्वेक्षणमा नेपाल सबैभन्दा उपल्लो सूचीमा परेको छ ।  प्रतिबेदन अनुसार, कुल ५८ प्रतिशत नेपालीले गएको वर्ष नेपालमा भ्रष्टाचार बढेको प्रतिक्रिया दिएका छन् । जबकी ओली भने आफ्नो सरकार इतिहासमै भ्रष्टाचार नियन्त्रणमा अब्बल भएको दावी गर्दैछन् ।

गएको वर्ष नेपालमा भ्रष्टाचारका केही चर्चित काण्ड भएका छन् । कोरोना महामारीकै बेला ओम्नी समूहले औषधि तथा स्वास्थ उपकरण खरिद गर्दा गरेको अर्बाैं रुपैयाँको भ्रष्टाचार होस् वा यति होल्डिङ्स प्रकरणले ओली सरकारको सक्कली अनुहार जनसमक्ष उदांगो भएकै थियो । यस्तै, ३३ किलो सुन काण्ड, वाइड र न्यारो बडी जहाज काण्ड वा ललिता निवास काण्डमा ओली सरकारको संलग्नताबारे नेपाली मिडियाले धज्जी उडाएका थिए । तर ओली भने आफ्नो लोकप्रियताबाट डराएकाहरुले जथाभावी गरेको भन्दै उल्टो गाली गर्दै थिए ।

त्यही कुरालाई जनताले भने पत्याएको र सोही बमोजिमको प्रतिक्रिया दिएको प्रष्ट संकेत ट्रान्सपरेन्सीको पछिल्लो प्रतिबेदनले प्रष्ट पारेको छ ।
अझ गम्भिर प्रश्न त जनताले सबै काण्डमा प्रधानमन्त्री ओलीकै संलग्नतालाई उजागर गरेका छन् । प्रतिबेदनले प्रष्टसँग भनेको छ– भ्रष्टाचार नियन्त्रणमा प्रधानमन्त्रीको उदासिनता उदेकलाग्दो बनेको छ । उल्टो प्रधानमन्त्रीले भ्रष्टहरुकै पक्षपोषण गरेको पनि प्रतिबेदनले बोलेको छ । ओली सरकारको भ्रष्टाचारप्रतिको गैरजिम्मेवारीले जनतामा चरम निराशा उत्पन्न गराएको पनि प्रतिबेदनमा उल्लेख छ ।

प्रधानमन्त्री ओली भ्रष्टाचार नियन्त्रणमा सबैभन्दा कमजोर देखिएको भन्दै प्रतिबेदनले बरु निकटवर्तीका सन्दर्भमा प्रश्न उठ्दा न्यायिक प्रणाली नै प्रभावित गर्ने गरी ढाकछोप गर्ने गरेको आरोप लगाएको छ । स्वतन्त्र न्यायिक प्रणालीले अनुसन्धान गर्न नपाउँदै ओलीले आफूनिकटलाई सफाई दिने गरेकोसमेत प्रतिबेदनले उल्लेख गरेको छ । सेक्युरिटी प्रिन्टिङ प्रेस खरिद प्रकरणमा तत्कालिन सञ्चारमन्त्री गोकुल बाँस्कोटाले ७० करोड मोलमोलाई गरेको सन्दर्भलाई प्रतिबेदनले आधार बनाएको हाे ।

नेपाली जनतासँग गरिएको सर्वेक्षणमा सहभागी आधा अर्थात ५० प्रतिशत भन्दा बढीको प्रतिक्रिया भ्रष्टाचार बढ्नुमा राष्ट्रपति वा प्रधानमन्त्रीको प्रत्यक्ष संलग्नता रहेको भन्ने देखिन्छ । कार्यकारी अधिकार प्राप्त व्यक्ति नै भ्रष्टाचारको कारक भन्ने प्रतिक्रियाले देशको सम्पूर्ण प्रणाली नै भ्रष्ट भएको प्रष्ट संकेत गरेको छ । जनताले प्रधानमन्त्री नै भ्रष्टाचारको जड भन्दै छन् तर ओली भने भ्रष्टाचार विरोधी भएको नाटक गर्दैछन् ।

ओली सरकारको प्रशासनिक निकाय ज्यादै भ्रष्ट भएको प्रतिक्रिया नेपाली जनताले दिएका छन् । प्रतिबेदन भन्छ– सर्वेक्षणमा सहभागी धेरैले सरकारी संयन्त्रको कुनैपनि काम लिनका लागि घूस ख्वाउनुपर्ने अवस्था रहेको बताएका छन् । यस्तो प्रतिक्रियाले देशका सबै संयन्त्र भ्रष्ट भएको पुष्टी गर्छ ।

ओली सरकारले जतिसुकै झुठो दाबी गरेपनि स्वतन्त्र ढंगले गरिएको सर्वेक्षणमा सबै गलत भएको साबित भएको छ । नेपाली जनताले ओली सरकारको भ्रष्ट शैली राम्ररी बुझेको अवस्था छ । जनताको यस्तो अभिव्यक्तिले नेपालमा भ्रष्टाचार संस्थागत गर्ने काम नै सरकारबाट हुने गरेको छर्लङ्ग पारेको छ ।

ओली सरकार भ्रष्टहरुकै संरक्षक भएको स्वयं त्यही पार्टीका नेताहरुको आरोप रहेको छ । ओम्नी र यति होल्डिङससँगको साँठगाँठले पार्टीमा ठूलै हंगामा मच्चिएको हो । तर ओलीले भ्रष्ट प्रवृत्तिलाई नै मलजल गरेकाले पार्टी कार्यकर्ता भन्दा बिचौलियाहरुको बोलबाला बढेको हो । साथै, ट्रान्सपरेन्सी इन्टरनेशलनको यो प्रतिबेदनले ओलीले भन्दै आएकाे सरकारको लोकप्रियता कस्ताे हाे भन्ने पनि प्रष्ट्याएको छ ।