माउन्टेन इनर्जी र युनाईटेड इदी मार्दीको शेयर आगामी हप्ता बाँडफाँड हुने

१२ मंसिर, काठमाडौं । माउन्टेन इनर्जी र युनाईटेड इदी मार्दी एण्ड आरबिको शेयर आगामी हप्ता बाँडफाँड हुने भएको छ ।

माउन्टेन इनर्जी हाइड्रोपावरले बिक्रीमा ल्याएको साधारण शेयर आउने हप्ता बाँडफाँड हुने भएको छ । बिक्री प्रबन्धक नबिल इन्भेष्टमेन्ट बैंकिङ्गले दिएको जानकारी अनुसार आजै प्रि अलटेमन्ट गर्ने तयारी गरिएको छ। आईपीओ धेरै डुप्लिकेसन देखिएपछि सोको भेरिफाइ गर्न केही समय लाग्ने भएको छ । क्यापिटलका अनुसार डाटा भेरिफिकेसनको काम सकिन लागेको र प्रिअलटमेन्ट गर्ने तयारी भइरहेको छ । आइतबार प्रिअलटमेन्ट सकेर मंगलबार, बुधबारभित्र शेयर बाँडफाँड गर्ने तयारी भइरहेको छ ।

माउन्टेन इनर्जीले बिक्रीमा ल्याएको आईपीओमा साढे सात गुणाभन्दा धेरै आवेदन परेको छ। कम्पनीले सर्वसाधारणमा १८ लाख ३० हजार २६५ कित्ता शेयर बिक्रीमा ल्याएकोमा १ करोड ३९ लाख ४४ हजार ४१० कित्ता शेयर खरिदको लागि आवेदन परेको बिक्री प्रबन्धकले जनाएको । यो मागभन्दा ७.६१ गुणा धेरै हो । यसमा अझै केहि आवेदन रद्द हुनसक्ने भएकोले आवेदनको संख्या केहि घट्न सक्छ।

धितोपत्र बाँडफाँड निर्देशिका अनुसार कम्पनीले बिक्रीमा ल्याएको आइपीओ १ लाख ८३ हजार जना आवेदकले मात्र १० कित्ताको दरले शेयर पाँउछन् । यसअनुसार हालसम्मको तथ्यांक अनुसार आर्इपीओमा आवेदन गर्ने बाँकी ४ लाख ९१ हजार जना आवेदकको भने हात खाली हुने भएको छ। यो कुल आवेदकको ७२ प्रतिशत हो ।

युनाईटेड इदी मार्दी एण्ड आरबिको पनि आउने हप्ता बाँडफाँड

युनाईटेड इदी मार्दी एण्ड आरबि हाइड्रोपावरले बिक्रीमा ल्याएको आईपीओ पनि बाँडफाँड गर्ने तयारीमा रहेकाेछ । बिक्री प्रबन्धक ग्लोबल आइएमई क्यापिटलका अनुसार कम्पनीको आईपीओको आज प्रि अलटमेन्ट सकिएको छ । अब ढिलोमा आगामी मंगलबार सम्ममा आइपीओ बाँडफाँड गर्ने क्यापिटलले जनाएको छ ।

प्रि अलटमेन्ट भएपछि ३ दिन भित्र आईपीओ बाँडफाँड गर्नुपर्ने हुन्छ । कम्पनीले पहिलो चरणमा उद्योग प्रभावित क्षेत्र कास्की जिल्लाका आयोजना प्रभावित स्थानीय बासिन्दाहरुका लागि ४ लाख २० हजार कित्ता आईपीओ बिक्री गरेको थियो । सो मध्ये बिक्री नभएको २ लाख ४३ हजार ९१० कित्तासहित कम्पनीले सर्वसाधारणका लागि आईपीओ निष्काशनमा ल्याएको थियो ।