महासंघको चुनावमा ६५ प्रतिशत मत खस्याे

१३ मंसिर, काठमाडौं । काठमाडौंमा जारी नेपाल उद्योग वाणिज्य महासंघको निर्वाचनमा ६५ प्रतिशत मत खसेको छ । बिहान ९ बजेदेखि शुरु भएको मतदानमा १ बजे सम्म ६५ प्रतिशत मत खसेको निर्वाचन समितिले जानकारी दिएको छ ।

समितिका अनुसार जिल्ला नगरतर्फ ५९ वटा मतदान भइसकेको छ । जिल्ला नगरमा कुल मत १०५ हो । यसैगरी एशोसिएटमा ६१२ मत अर्थात ५५ प्रतिशत भन्दा धेरै खसिसकेको छ । एशोसिएटमा ९०५ कुल मत रहेको छ । उता वस्तुगत संघमा १०१ मत रहेकोमा ६१ मत खसिसकेको छ । मतदान अपरान्ह ४ बजेसम्म जारी रहनेछ ।

वरिष्ठ उपाध्यक्षका उम्मेदवारद्वय चन्द्र ढकाल र किशोर प्रधानलगायतका उम्मेदवारहरुले बढीभन्दा बढी मत आफूतिर तान्ने प्रयास जारी राखेका छन् । ढकाल एशोसिएट सदस्य भएकाले कार्की व्याङ्केटबाट र प्रधान बस्तुगत समूहको सदस्य भएकाले महासंघको केन्द्रीय कार्यालय टेकुबाट मतदान गर्दैछन् । महासंघको केन्द्रीय कार्यालय टेकु, कार्की व्याङ्केट बबरमहल र नेपाल प्रज्ञा प्रतिष्ठान कमलादीमा मतदानको व्यवस्था मिलाइएको छ ।

कमलादीमा उद्योग वाणिज्य समूह, बबरमहलमा एशोसिएट सदस्य समूह र टेकुमा बस्तुगत संघ समूहको मतदानको व्यवस्था मिलाइएको छ । कोराना संक्रमित मतदाताहरुका लागि नेपाल प्रज्ञा प्रतिष्ठान कमलादीमा व्यवस्था गरिएको छ ।

महासंघको ५४ औं साधारणसभा ११ मंसिरदेखि सुरु भएको थियो । प्रधानमन्त्री केपी शर्मा ओलीले भर्चुअल विधिबाट साधारणसभा उदघाटन गरेका थिए । बन्दसत्र पनि भर्चुअल विधिबाटै गरिएको थियो । गत चैतमा हुनुपर्ने महासंघको साधारणसभा तथा निर्वाचन कोभिड–१९ का कारण पटक–पटक स्थगित भएको थियो ।