नेकपा महासचिवको भूमिकाप्रति वामदेवको असन्तुष्टि, ओलीलाई साथ नदिन आग्रह

१४ मंसिर, काठमाडौं । सत्तारुढ नेकपा विवादमा महासचिव विष्णु पौडेलको भूमिकाप्रति उपाध्यक्ष वामदेव गौतमले असन्तुष्टि जनाएका छन् । पार्टी फुटको गतिमा अगाडी बढेको बेला महासचिव पौडेलले प्रधानमन्त्री तथा नेकपा अध्यक्ष केपी शर्मा ओलीलाई मात्रै साथ दिएको भन्दै वामदेवले असन्तुष्टि जनाएका हुन् ।

साथै गौतमले पार्टीलाई फुटतर्फ लैजाने ओलीको योजनामा साथ नदिन पनि वामदेवले आग्रह गरेका छन् । शनिबार सचिवालय बैठकमा वामदेवले पौडेलको भूमिकाप्रति आपत्ति जनाएका थिए ।

बैठकको व्यवस्थापन मिलाउन नसक्दा पार्टीमा समस्या देखिएको उपाध्यक्ष गौतमको भनाइ छ। गत कात्तिक २८ गते सचिवालय बैठकमा कार्यकारी अध्यक्ष पुष्पकमल दाहाल प्रचण्डले प्रधानमन्त्रीसमेत रहेका अर्का अध्यक्ष केपी शर्मा ओलीको आलोचना गर्दै प्रस्ताव पेश गरेका थिए।

शनिबार प्रधानमन्त्रीसमेत रहेका अध्यक्ष ओलीले कार्यकारी अध्यक्ष प्रचण्डले उठाएका सवालबारे जवाफ सचिवालय बैठकमा पेश गरेका छन्। नेकपा सचिवालय बैठकमा दुवै अध्यक्षले एक अर्कालाई आरोपपत्र जस्तो प्रतिवेदन पेश गरेपछि नेकपाको विवाद बढ्दो छ ।