नेपाली सेनामा नक्कली परीक्षा दिने पक्राउ, परीक्षा दिन लगाउने पनि प्रहरी हिराशतमा

१५ मंसिर, कञ्चनपुर । नेपाली सेनाको परीक्षामा नक्कली परीक्षा दिने र दिन लगाउने दुई जना पक्राउ परेका छन् । लोक सेवा आयोगले लिँदै गरेको नेपाली सेनाको सैन्य दर्जाको परीक्षामा अर्कै व्यक्तिको नाममा परीक्षा दिने र दिन लगाउने दुई व्यक्तिलाई प्रहरीले पक्राउ गरेको हो ।

कञ्चनपुर भीमदत्त नगरपालिका वडा नम्बर ४ मा रहेको कञ्चन विद्या मन्दिर परीक्षा केन्द्रमा अर्कै व्यक्तिको नाममा परीक्षा दिइरहेको आरोपमा डोटी सायल गाउँपालिका वडा नम्बर ६ का २२ वर्षिय सुमन खड्कालाई प्रहरीले नियन्त्रणमा लिएको हो । उनले बझाङ दुर्गाथली गाउँपालिका वडा नम्बर ४ का २२ वर्षिय मुकेश भण्डारीको नाममा परीक्षा दिइरहेका थिए ।

प्रहरीले वास्तविक परीक्षार्थी भण्डारीलाई पनि पक्राउ गरेको छ । गएको शुक्रबार दिउँसो १ बजेदेखि सवा ३ बजेसम्म नेपाली सेनाको सैन्य दर्जाका लागि लिखित परीक्षा भएको थियो।