गृहमन्त्री ज्यू ! ‘नमस्ते’ गर्दैमा सानो भइँदैन : कांग्रेस नेता गुरुङ

१५ मंसिर, काठमाडौं । नेपाली कांग्रेसका केन्द्रीय सदस्य तथा युवा नेता धनराज गुरुङले नेपालीको संस्कार ‘नमस्ते’ गर्दैमा सानो नभईने बताएका छन । कोरोनाका कारण संसारले नेपालीको अभिवादन गर्ने संस्कार ‘नमस्ते’ गर्न थालिसकेको बताउदै नेता गुरुङले ‘नमस्ते’ गर्दैमा सानो नभईने बताएका हुन् ।

सामाजिक सञ्जाल ट्वीटरमा एक स्टाटस लेख्दै नेता गुरुङले भनेका छन्, कोरोनाका कारण संसारले नेपालीको अभिवादन गर्ने संस्कार ‘नमस्ते’ गर्न थालिसक्यो। हाम्रा गृहमन्त्रीले भने कुइनो ठोक्काएर नेपालीको परम्परागत ‘नमस्ते’ संस्कारलाई नै चुनौती दिनुभयो त ! ‘नमस्ते’ गर्दैमा सानो भइँदैन। बरु सभ्य र सुसंस्कृतको भाव प्रदर्शन गर्दछ। आगे महाराजको जो मर्जी ।

आइतबार काठमाडौं आएका चिनियाँ रक्षामन्त्री वेइ फेङ्गहको सवगत गर्न त्रिभुवन अन्तर्राष्ट्रिय विमानस्थलमा गृहमन्त्री रामबहादुर थापा ‘बादल ‘ पुगेका थिए । २१ सदस्यीय प्रतिनिधि मण्डलको नेतृत्व गर्दै चार्टर्ड विमानमा नेपाल आएका रक्षामन्त्री वेइ आइतबार बिहान पौने ११ बजे त्रिभुवन अन्तर्राष्ट्रिय विमानस्थलमा अवतरण गरेका थिए ।

रक्षामन्त्री वेइलाई पुष्पगुञ्छा दिँदै कुहिना जोडेर गृहमन्त्री थापाले स्वागत गरेको तस्विर अहिले सामाजिक सञ्जालमा छाइरहेको छ । कोरोना भाइरस संक्रमणका कारण हात मिलाउन छाडेर कुहिना जोडेर स्वागत गरिएको हो ।