सचिवालय बैठकमा प्रचण्ड र नेपालले आफ्ना कुरा राख्ने

१६ मंसिर, काठमाडौं । सत्तारुढ नेपाल कम्युनिष्ट पार्टीको वहुचर्चित एवं प्रतिक्षित आज बस्ने सचिवालय बैठकमा कार्यकारी अध्यक्ष पुष्पकमल दाहाल प्रचण्डले अर्का अध्यक्ष एवं प्रधानमन्त्री केपी ओलीलाई जवाफ फर्काउने भएका छन् । ओली प्रधानमन्त्री भएयता उनको सरकारी निवास बालुवाटारमा हुने गरेको सचिवालय बैठक आज पार्टी कार्यालय धुम्बाराहीमा बस्दैछ ।

बैठकमा प्रचण्डले गएको शनिबार ओलीले उठाएका प्रश्नको जवाफ दिने भएकाछन् ।  ओलीले यसअघि प्रचण्डद्वारा प्रस्तुत राजनीतिक प्रस्तावलाई आरोपपत्र भन्दै खारेज गर्न र क्षमायाचनासहित फिर्ता गर्न भनिसकेका छन् । तर प्रचण्डले भने उक्त प्रस्ताव राजनीति दस्ताबेज भएको र ओलीले आफ्नो प्रतिबेदनलाई मात्र दस्ताबेज मान्नुपर्ने हठ त्याग्न आज आग्रह गर्ने स्रोतको दाबी छ ।

आजको बैठकमा प्रचण्डले ओलीको प्रस्तावको जवाफ लिखित रुपमै दिन तयारी गरेकाछन् । तर नेता माधवकुमार नेपाल र झलनाथ खनालले लिखित पत्रको आदानप्रदानले पार्टी भित्र फुटको वातावरण बन्न सक्ने भन्दै मौखिक रुपमै आफ्ना कुरा राख्न प्रचण्डलाई आग्रह गरेकाछन् ।

आजको बैठकमा प्रचण्डले आफ्ना कुरा राखिसकेपछि ओलीले कस्तो प्रतिक्रिया दिन्छन् , त्यसैमा भावी कदम तय गर्ने प्रचण्ड–नेपाल पक्षको तयारी छ । ओलीले आफ्नो दम्भ त्यागेर आत्मालोचना गरी दुई मध्ये एक पद त्याग्न सहमति जनाए भने मात्र नयाँ सहमति हुने नत्र प्रचण्डको प्रस्ताव सचिबालय हुँदै स्थायी कमिटी र केन्द्रीय कमिटीबाट पास गराउने रणनीति बनाइएको स्रोतले बतायो ।

लोकतन्त्रमा वहुमतको अर्थ हुन्छ, संक्रमण कालको आडमा निरंकुशता लाद्ने छुट कसैलाई नभएको भन्दै नेता नेपाल निकट केन्द्रीय सदस्य विष्णु रिजालले भने – विधि पद्धति नै मान्नु नपर्ने संक्रमणकालिन विधान हामीले बनाएका हैनौं । आवश्यकता अनुसार विधानले नै अल्पमत र वहुमतको आधार खडा गरेको छ ।

पार्टी एकताको लागि नेताहरुले त्याग गर्न सक्नुपर्छ भन्दै उनले मेरो गोरुको बाह्रै टक्का भन्ने हठ कायम रहेसम्म समस्या कायमै रहने बताए । पार्टी कमिटीको बैठक राख्न शीर्ष नेताहरुले नै निबेदन गर्नुपर्ने बिडम्बनाको अवस्था चित्रण गर्दै उनले भने–नेकपा लोकतन्त्रमा विश्वास गर्ने पार्टी हो, हामीले निरंकुशतन्त्रलाई अपनाएका हैनौं । त्यसैले विमतिलाई थान्को लगाउन वहुमतको आधारमा निर्णय गर्नैपर्छ ।

तर ओली पक्षले भने यस्तो तर्कलाई बिल्कुलै खारेज गरेको छ । ओली निकट मानिने स्थायी कमिटी सदस्य सत्यनारायण मण्डल भन्छन्–महाधिवेशन नभएसम्म पार्टी भित्र अल्पमत वहुमतको परीक्षण गर्ने छुट कसैलाई छैन । पार्टी कमिटीमा जतिपनि अजेण्डा जान्छन् सबै दुईजना अध्यक्षको सहमतिमा हुनुपर्ने व्यवस्था विधानमा छ । यस्तो अवस्थामा वहुमत र अल्पमतका कुनै अर्थ छैन । त्यसका लागि महाधिवेशन नै पर्खनुपर्छ ।

पार्टी भित्र हरेक कमिटीमा ओली अल्पमतमा छन् । प्रचण्ड र नेता नेपाल पक्षबीच समीकरण मिलेकाले ओली कमजोर छन् । त्यसैले उनले यस्ता तर्क गरेको सबैले बुझेको विषय हो ।  त्यसैले ओलीले आफ्नो अहं र दम्भ नत्यागेसम्म अब पुरानो शक्ति र हैसियत नरहने पक्का छ । अहिले भएको विवादले पार्टीलाई एउटा निश्चित धारमा लैजानैपर्ने परिस्थिति निर्माण भएको छ ।

नेता नेपाल ओलीको कार्यशैलीप्रति प्रचण्ड भन्दा बढी आक्रोशित छन् । किनभने ओलीले नेपाल पक्षलाई पार्टी र सरकार दुबै मोर्चामा कमजोर बनाउने रणनीति बनाएको देखिन्छ । जसले गर्दा अहिलेको विवाद मिलाउन प्रचण्ड लचिलो भएपनि नेपालले भने मान्ने अवस्था देखिंदैन ।आजको सचिवालय बैठकमा नेता नेपालले पनि कडा रुपमा आफूलाई प्रस्तुत गर्ने भएका छन् । नेता नेपालले ओलीको प्रतिबेदनमाथि टिप्पणी गर्ने जानकारी केन्द्रीय सदस्य रिजालले दिए ।

प्रधानमन्त्री ओलीले धाक धम्की दिएर वहुमतलाई कजाउँछु भन्ने सोचेको भए अब त्यो संभव नभएको नेता नेपालले निकट नेताहरुलाई बताउने गरेकाछन् । आजको बैठकमा नेता नेपालले यही पक्षमा जोड दिने रिजालको भनाई छ । सचिवालय बैठकमा अरु नेताहरुले पनि बोल्ने भएका छन् । गत शनिबार ओलीले प्रचण्डलाई जवाफ फर्काउँदा सचिवालय सदस्यहरु रामबहादुर थापा, नारायणकाजी श्रेष्ठ, इश्वर पोखरेल र विष्णु पौडेलले केही बोलेका थिएनन् । तर आज भने सबैले आफ्नो धारणा राख्ने भएकाछन् । बैठक दिउँसो १ बजे बस्ने कार्यक्रम तय गरिएकोछ ।