ओली सरकार देशमा शान्ति स्थापना गर्न असफल : सभापति केसी

१७ मंसिर, काठमाडौं । नेपाली कांग्रेस नुवाकोटका सभापति एवं सविधानसभा सदस्य जगदिश्वर नरसिंह केसीले सरकारले कुटनीतिक पहलबाट सीमा विवादकाे समाधान खोज्नुपर्ने बताएका छन् । उनले सरकारले नेपाली भुमि फिर्ताको लागि तत्काल पहल गर्नुपर्ने बताएका छन् । सरकारको एकदलीय अधिनायकवादी सोचले अहिले देश गम्भीर राजनीतिक संकटमा फसेको उनको भनाइ थियो ।

ओली सरकार देश निर्माण गर्न र देशमा शान्ति स्थापना गर्न असफल भएको बताउदै केसीले ओलीले काम नगरी हावा कुरा मात्र गरेको तर जनताले पत्याउँदा अहिले पछुतो मानिरहेको बताए । हत्या, हिंसा र भष्ट्राचार दिनप्रतिदिन बढेको तर दोषीलाई कारवाही गर्नुको साटो उल्टो सरकारले नै संरक्षण गरेको उनले आरोप लगाएका छन् ।

पटक पटक भएका जनआन्दोलनको नेतृत्व कांग्रेसले गरेको तर अरु पार्टी जस्तो प्रचार गर्न नजानेकाले कांग्रेसले केही नगरे जस्तो देखिएको बताउदै उनले देशलाई नयाँ ढंगले परिवर्तन गर्ने काम कांग्रेसकै नेतृत्वमा भएको दाबी समेत गरेका छन् ।

यो पाँच वर्षको अवधिमा दायाँ बायाँ नगरीकन विपक्षमा बसेर पार्टी निर्माण र संगठन विस्तारमा सबै एकजुट भएर लाग्ने र महाधिवेशनपछि पार्टी अझ सशक्त र बलियो हुने बताए ।