अपमानपूर्ण ढंगले नेता पौडेललाई लछार पछार गर्नु सरकारी निरंकुशताको चरम उत्कर्ष : नेता केसी

१८ मंसिर, काठमाडौं । नेपाली कांग्रेसका नेता तथा पूर्वमन्त्री अर्जुननरसिह केसीले सरकारले वरिष्ठ नेता रामचन्द्र पौडेललाई अपमानपूर्ण ढंगले लछार पछार गर्नु सरकारी निरंकुशताको चरम उत्कर्ष भएको बताएका छन् ।

सामाजिक सञ्जाल ट्वीटरमा एक विचार पोष्ट गर्दै नेता केसीले कांग्रेसका वरिष्ठ नेता पौडेललाई केपी ओली सरकारले सुनियोजित ढंगले नै पक्राउ गरेको आरेप लगाएका छन् । तनहुँको ब्यास नगरपालिकाको बुल्दी खोलामा बनेको पुल उद्घाटनका लागि जाने क्रममा वरिष्ठ नेता पौडेललाई अपमानपूर्ण ढंगले लछार पछार गर्नु सरकारी निरंकुशताको चरम उत्कर्ष भएको बताएका हुन् ।

उनले लेखेका छन्, “कांग्रेसका नेता वरिष्ठ नेता रामचन्द्र पौडेल लगायत तनहुका दर्जनौ काँग्रेसका नेतालाई अपमानपूर्ण ढंगले लछार पछार गरि गिरफ्तार गर्नु सरकारी निरंकुशताको चरम उत्कर्ष हो।यसको घोर भर्त्सना गर्दै विचारका विविधता र प्रतीपक्ष लाई दुश्मन ठान्ने प्रवृद्धी तथा यो राज्य कब्जा नीति समयमै बुझ्नु जरुरी छ।”

मंगलबारदेखि गृह जिल्लामा रहेका पौडेलले व्यास नगरपालिका र ऋषिङ गाउँपालिका जोड्न सेती नदीमाथि बनेको पक्की पुल उद्घाटन गरेका थिए ।ब्यास नगरपालिकामा वडा नम्बर १, १० र ११ जोड्ने तालघरे दुम्सीचौर सडकको बुल्दीखोला पुल उद्घाटन गर्न नपाउँदै विरोधको सामना गर्नुपरेको थियो । तर पछि पक्राउ परेका पौडेललाई प्रहरीले नियन्त्रणमा लिएर हिजो साँझ साढे ५ बजे छाडेको छ ।