बर्दियामा कारलाई टिप्परले ठक्कर दिँदा २ युवाको मृत्यु, तीन घाइते

१८ मंसिर, बर्दिया । बर्दियामा गाडी दुर्घटना हुँदा दुई जनाको मृत्यु भएको छ । गुलरियाबाट भुरीगाउँतर्फ गइरहेको बा १६ च नम्बरको कारलाई ढोढरीबाट गुलरियातर्फ आइरहेको ना ८ ख ३१४ नम्बरको टिपरले ठक्कर दिँदा दुई जनाको घटनास्थलमै मृत्यु भएको हो ।

हुलाकी सडक अन्तर्गत मधुवन नगरपालिका माचर चोकमा दुर्घटना हुँदा कारमा सवार गुलरिया नपा—४ का २३ वर्षीय सुरेन्द्र गोडिया र भिमदत्त नगरपालिकाका १८ वर्षीय निधि सुनारको मृत्यु भएको हो ।

यस्तै कारमा सवार चालक गुलरिया—४ का मनोज लोनिया, भिमदत्त नगरपालिकी कमला सुनार र सोही ठाउँकी कृतिका सुनार गम्भीर घाइते भएका छन् ।

उनीहरुलाई उपचारका लागि नेपालगञ्ज पठाइएको छ । टिपर चालक कोहलपुर—६ रझेनाका रमेश चौधरीलाई प्रहरीले नियन्त्रणमा लिएको छ ।