हुलाकी सडकको बिसनपुर–स्वर्णपट्टी सडकको अतिक्रमण हटाउन सुरु

◊ धीरुभाई

२० मंसिर सप्तरी । सप्तरीको बोदेबर्साइन नगरपालिकाले शुक्रबार हुलाकी सडकको बिसनपुर–स्वर्णपट्टी सडक खण्डमा अतिक्रमण हटाउन सुरु गरिएको छ । ।  नगरपालिकाले नगर क्षेत्रको हुलाकी सडक अन्तर्गत बिसनपुर–स्वर्णपट्टी सडक खण्डमा सडक पेट्टीका अतिक्रमण हटाउन सुरु गरेका हुन ।

सडकपेट्टीमा घर निर्माण सामग्री वालुवा, गिट्टी, छड, काठ, दाउरा लगायत कठघरा (गुम्टी), खाद्यान्न, गुइँठा, ठूलो सवारी साधन, अस्थायी पसलहरु नगरपालिकाले हटाएका छन ।  सडक पेट्टीमा ती सामग्रीहरु महिनौ दिनसम्म राख्दा बाटो नै साँगुरो भइ सवारी सधानलाई गुड्न सास्ती भोग्नु पर्नुकोसाथै सडकलाई नै कुरुप बनाइएको थियो । यसले पैदलयात्रु, सानो सवारी साधन समेतलाई आउजाउ गर्न समस्या भोग्नुको साथै दुर्घटना हुने गरेको थियो ।

सडकलाई नै अतिक्रमण गरी निजी रुपमा प्रयोग भइरहेको कारण नगरपालिकाले ती अतिक्रमण हटाउन पटक÷पटक सूचना जारी गर्दापनि नगरवासीले अटेर गर्दै आएका थिए । पछिल्लो पटक नगरपालिकाले सडकमा अतिक्रमण हटाउन गत कात्तिक १८ गते सार्वजनिक सूचना जारी गरेको प्रमुख प्रशासकीय अधिकृत गजेन्द्रनाथ शर्माले जानकारी दिए । सात दिनमा अतिक्रमण खाली गर्न भनिएको उक्त सूचनालाई समेत अटेर गर्दा शुक्रबार नगरपालिकाले स्थानीय सुरक्षाकर्मीको सहयोगमा जेसीबी लगाएर अतिक्रमण हटाएको बताएका छन ।

हुलाकी सडकको बिसनपुर स्वर्णपट्टी सडक निर्माण सम्पन्न भएपनि हस्तान्तरण भएको छैन । यस सडकको ग्रामिण बस्ति खण्डमा सडकमै गाईबस्तु बाँध्ने, धान सुकाउने, थ्रसेर राखेर दाउनी गर्ने, विवाहमा टेण्ट लगाउने, भोतभतेर गर्ने, दाउरा सुकाउने लगायतको कार्य हुने गरेको छ ।