नेपालमा पनि किसान आन्दोलित, माइतीघरबाट निकास ननिस्किए बालुवाटारसम्मकाे घेराउ

२४ मंसिर, काठमाडौं । मंगलबार भारतका धेरै राज्यहरु किसानहरुले गरेको भारत बन्द गरेको भोलीपल्ट बुधबार नेपालमा पनि उखु किसान आन्दोलित भएका छन् । नरेन्द्र मोदी सरकारले ल्याएको कृषि कानुनविरुद्ध पन्जाब र हरियाणका किसान १३ दिनदेखि आन्दोलनमा छन्। भारतका किसानले राजधानी दिल्लीलगायत देशका विभिन्न जिल्लामा प्रदर्शन जारी राखेका छन्।

यता नेपालमा पनि उखु किसान पुन: आन्दोलनमा उत्रने भएका छन् । अब सर्लाहीका उखु किसानले काठमाडौं केन्द्रित आन्दोलनको गर्ने भएका हुन् । चिनी मिल सञ्चालकबाट बक्यौता रकम उठाइदिन सरकारले गरेको बाचा पुरा नभएको भन्दै मंसिर २८ गतेदेखि माइतीघर मण्डलामा आन्दोलन सुरु गर्ने किसानले बताएका छन् ।

माइतीघर मण्डलाबाट निकास ननिस्किए सिंहदरबार र बालुवाटार घेराउसम्मको आन्दोलन गर्ने गरी तयारी गरिएको किसानले  बताएका छन् । यसपटकको आन्दोलनको लागी मंसिर २७ गते बेलुका सर्लाहीबाट करिब पाँच सय जना किसान काठमाडौं आउने भएका छन् । ठूलो संख्यामा काठमाडौं आएर २८ गते माइतीघर घेराउ गर्ने कार्यक्रम रहेको उखु किसान संघर्ष समिति सर्लाहीका संरक्षक राकेश मिश्रले बताए ।

सरकारले किसानसँग गरेको पटक-पटकको बाचा अनुसार मंसिर २६ गतेसम्म किसानले बक्यैता प्राप्त गर्नुपर्ने भएपनि एक वर्षको अवधिमा कुनै प्रगति नभएपछि किसान फेरि आन्दोलन गर्न बाध्य भएका हुन् । सरकारले किसानसँग पटक-पटक सम्झौता गरेपनि त्यसको कार्यान्वयन नभएपछि निर्णायक आन्दोलनमा गर्ने क्षणमा पुग्नु परेको किसानहरुले बताएका छन् ।

काठमाडौं केन्द्रित आन्दोलनको कार्यक्रम अन्तरगत माइतीघर मण्डलामा शान्तिपूर्ण धर्ना दिने, नागरिक समाज, सञ्चारकर्मी र मानव अधिकारकर्मीलाई आफ्नो ब्यथा सुनाउने लगायतका तयारी किसानहरुको छ । माइतीघरबाट निकास ननिस्किए चरणबद्ध रुपमा सिंहदरबार र बालुवाटार घेर्नेसम्मको आन्दोलनका लागि किसानहरु तयार भएको संरक्षक मिश्रले बताए ।

चार वटा चिनी मिलबाट उखु किसानले करोडौं रुपैयाँ बक्यौता पाउन बाँकी छ । सरकारी तथ्यांकअनुसार उखु मिलसँग किसानले अझै ५२ करोड भन्दा धेरै बक्यौता पाउनु पर्नेछ । जसअनुसार श्रीराम सुगर मिलले २६ करोड, इन्दिरा सुगर मिलले ४ करोड ७० लाख, लुम्बिनी सुगर मिलले ८ करोड ४१ लाख तथा अन्नपूर्ण सुगर मिलले १७ करोड रुपयाँ किसानलाई बुझाउन बाँकी छ ।