तिलाठी कोइलाडीमा लैङ्गिक हिंसा विरुद्ध अन्तरक्रिया

धीरुभाइ

२६ मंसिर सप्तरी । तिलाठी कोइलाडी गाउँपालिकाले लैंगिक हिंसा विरुद्धको १६ दिने अभियान अन्तर्गत लैंगिक हिंसा अन्त्यको प्रतिबद्धता : ब्यक्ति, समाज र सबैको ऐक्यबद्धता भन्ने नाराका साथ अन्तरक्रिया कार्यक्रम सम्पन्न भएकाे छ ।

कार्यक्रममा बोल्दै वक्ताहरुले लैंगिक हिंसाको अवस्था दिनानुदिन भयावह बन्दै गएकोले त्यसको न्युनीकरणका लागि सबैले आ–आफ्नो ठाउँबाट पहल गर्नु अति आवश्यक भएको बताए । पछिल्ला दिनहरुमा लैंगिक हिंसाका घटनाहरु अत्यधिक संख्यामा बढ्दै जानु चिन्ताको बिषय भएको भन्दै वक्ताहरुले त्यस्ता घटनाहरुले परिवार र समाजलाई नै नोक्सानी हुने कथन थियो । हिंसाका घटनाहरुलाई समाजमै मिलापत्र गराउने गर्नाले त्यस्ता अपराध गर्नेहरुको मनोबल बढ्दै गएको हुँदा समाजमा लैंगिक हिंसाका घटनाहरु बढ्दै गएको वक्ताहरुले बताए ।

सो कार्यक्रममा गाउँपालिकाका उपाध्यक्ष सुचिता कुमारी यादव, प्रमुख प्रशासकीय अधिकृत केशव कुमार झा, वडा अध्यक्षहरु दिनेश्वर मिश्र, खगेन्द्र मण्डल, मनोज चौधरी, गोविन यादव, लक्ष्मीप्रसाद मण्डल, गुलाबप्रसाद सिंह, जनस्वास्थ्य अधिकृत भूपेन्द्र झा तथा वडा सचिवहरु मिथिलेश झा, राजेश सिंह, जगदिश यादव, सन्तलाल मण्डल, मुक्तिलाल यादव सहितकाले मन्तब्य ब्यक्त गरे । गाउँपालिकाका विपद् ब्यवस्थापन अधिकृत राजेश कुमार झाले स्वागत गर्नुभएको कार्यक्रम जनस्वास्थ्य निरीक्षक दिपक कुमार मण्डलले सञ्चालन गरेका थिए ।