संवैधानिक परिषदको बैठक स्थगित, खल्तीको चिट नबनाउन केसीको चेतावनी

२८ मंसिर, काठमाडौं । संवैधानिक परिषदको बैठक स्थगित भएको छ । विपक्षी दलका नेता शेरवहादुर देउवा बैठकमा नआउने भएपछि संवैधानिक परिषदको बैठक स्थगित भएको हो ।

बैठक आज बिहान ९ बजेका लागि तय गरिएको थियो । स्थायी कमिटी बैठकको पूर्वसन्ध्यामा प्रधानमन्त्रीले संवैधानिक परिषद्को बैठक बोलाएका थिए । तर सरकारविरुद्ध प्रदर्शन हुन लागिरहेका बेला देउवा प्रधानमन्त्रीले बोलाएको बैठकमा नगएका हुन् ।

यसअघि पनि देउवा अनुपस्थित हुँदा संवैधानिक परिषद्को बैठक प्रभावित हुँदै आएको थियो । परिषद्को बैठक नबस्दा ४५ भन्दा बढी संवैधानिक पदहरू पूर्ति हुन सकेको छैन्।

संवैधानिक परिषद खल्तीको चिट संयोजन गर्न होइन : केसी

यसैबीच नेपाली कांग्रेसका नेता अर्जुननरसिंह केसीले संवैधानिक परिषद खल्तीको चिट संयाजन गर्न नबनाइएको भन्दै आफ्नो गोजीका कार्यकर्ता भर्ती नगर्न सुझाव दिएका छन् । सामाजिक सञ्जालमा टिप्पणी गर्दै नेता केसीले दलीय स्वार्थभन्दा माथि उठेको, देशले चिनेको व्यक्तिलाई संवैधानिक आयोगमा नियुक्त दिनुपर्ने बताएका हुन् ।

‘देशले चिनेको, दलीयस्वार्थ माथि उठेको, निष्पक्ष, सक्षम विषय विज्ञ तथा जनविश्वास आर्जन गरेको व्यक्तिहरुको साझा रोस्टरबाट पक्ष, प्रतिपक्ष र गुटगत भागबन्डा र संकीर्णता माथि उठेर संवैधानिक संस्थामा नियुक्तिको लागि नै संवैधानिक परिषदको व्यवस्था भएको हो’ नेता केसीले सामाजिक सञ्जालमा लेखेका छन्, ‘ खल्तीको चिट संयोजन गर्न होइन।’

पछिल्लो समय शीर्ष नेताहरु मिलेर संवैधानिक परिषदबाट गोजीका मान्छेलाई नियुक्ती दिएर कमिशन खाने गरेको आरोप लाग्ने गरेको छ ।