कोभिडका कारण सञ्चार क्षेत्र सबैभन्दा ठूलो समस्यामा : महासचिव विष्ट

२८ मंसिर, पर्वत ।  विश्वव्यापी महामारीका रुपमा फैलिएको कोभिड–१९ को सबैभन्दा ठूलो चपेटामा नेपालको सञ्चार क्षेत्र परेको एक कार्यक्रमका वक्ताले औंल्याएका छन् । नेपाल पत्रकार महासंघ गण्डकी प्रदेशले पर्वतको कुश्मामा आयोजना गरेको ‘कोभिड–१९ ले सञ्चार क्षेत्रमा पारेको असर र अबको पत्रकारिता’ विषयक अन्तरक्रियामा महासंघका केन्द्रीय महासचिव रमेश विष्टले कोभिडका कारण सञ्चार क्षेत्र सबैभन्दा ठूलो समस्यामा परेको बताउँदै सजग भएर काम गर्न आग्रह गरे । उनले पहिला आफू स्वस्थ्य भएमात्र स्वस्थ्य र सक्रियरुपमा पत्रकारिता गर्न सकिने बताउँदै स्वास्थ्य सुरक्षाका आवश्यक मापदण्ड पालन गरेर कार्यक्षेत्रमा खटिन आग्रह गरे ।

महासंघका पूर्वअध्यक्ष शिव गाउँलेले अबको पत्रकारितालाई परिमार्जन गर्न जरुरी रहेको बताए । खाली कुनै एक समूहको भजन गाउने र विज्ञापन गर्ने पत्रकारिताभन्दा पनि खोजमूलक पत्रकारितामा ध्यान दिनुपर्नेमा जोड दिए । अब पनि पुरानै शैलीको पत्रकारिता गर्ने हो भने सञ्चार क्षेत्रमा टिकिरहन समस्या हुने उनको भनाइ छ ।

कार्यक्रममा महासङ्घका केन्द्रीय सदस्य रामकृष्ण ज्ञवालीले कोभिड–१९ ले मोफसलका सञ्चार माध्यमहरु सबैभन्दा मारमा परेको बताउँदै यसका लागि तीनै तहका सरकार जिम्मेवार हुनुपर्ने बताए । पत्रकार र सञ्चार माध्यमको निरन्तरताका लागि राज्यको सहयोग आवश्यक रहेको उहाँको भनाइ छ । कार्यक्रममा पर्वत, बागलुङ म्याग्दीका पत्रकारको सहभागिता थियो ।