युवाहरुको इन्चोन रणनीति कार्यान्वयनको चुनौति विषयक कार्यशाला सम्पन्न

२८ मंसिर, काठमाडौं । अपांगता भएका युवाहरुको इन्चोन रणनीति कार्यान्वयनको अवस्था र चुनौतिका विषयमा काठमाडौंमा कार्यशाला सम्पन्न भएको छ । राष्ट्रिय शारीरिक अपाङ्ग संघ र एशिया प्यासेफिक अपाङ्गता भएका युवाहरुको इन्चोन रणनीतिको नेटवर्कको आयोजनामा अन्तरक्रियात्मक कार्यशाला सम्पन्न भएको हो ।

राष्ट्रिय अपाङ्ग युवा सञ्जाल नेपाल र नेत्रहिन युवा संघ नेपालको सहकार्यमा भएको कार्यक्रममा अपाङ्गता भएका युवाहरुको इन्चोन रणनीतिको कार्यन्वयनको अवस्था र चुनौती विषयक व्यापक छलफल भएको थियो ।

कार्यशालामा आयोजक संस्था राष्ट्रिय शारीरिक अपाङ्ग संघ नेपालका अध्यक्ष किरण शिल्पकारले इन्चोन रणनीतिको पूर्ण रुपमा कार्यन्वयन गरी अपाङ्गता भएका व्यक्तिहरुको पहुँचयुक्तताको सवालमा वकालत गर्नु पर्ने कुरामा जोड दिए ।

त्यसै गरी नेत्रहिन महिला संघकी कार्यक्रम अधिकृत लक्ष्मी नेपालले इन्चोन रणनीति, अपाङ्गता भएका व्यक्तिहरुको अधिकार सम्बन्धी महासन्धि र दिगो विकास लक्ष्य कार्यन्वयनमा एशिया प्रान्त क्षेत्रका युवाहरुको भूमिकाको विषयमा कार्यपत्र प्रस्तुत गरेकी थिइन् ।

कार्यशालामा नेत्रहिन युवा संघ नेपालका महासचिव रामचन्द्र गैरेले अपाङ्गता भएका युवाहरुका लागि बनेका नीति निययमहरु कर्यन्वयन हुनु पर्ने बताए । यस्तै राष्ट्रिय अपाङ्ग युवा सञ्जालका अध्यक्ष महेन्द्र थापाले अपाङ्गता भएका व्यक्तिहरुका लागि बनेका जति पनि नीति नियमहरु तथा ऐन कानूनहरु पूर्ण रुपमा कार्यन्वयनका लागि सबै एक जुट भएर सरकारको ध्यान केन्द्रित गर्नु पर्ने कुरामा जोड दिए ।

त्यसै गरी राष्ट्रिय अपाङ्ग महासंघ नेपालकी उपाध्यक्ष रमा ढकालले राज्यका सबै निकायहरुमा अपाङ्गता भएका युवाहरुको पहुँच हुन जरुरी रहेको बताइन् । उक्त कार्यक्रमका प्रमुख अतिथि एवं राष्ट्रिय अपाङ्ग महासंघ नेपालका अध्यक्ष मित्रलाल शर्माले अपाङ्गता भएका व्यक्तिहरुका विभिन्न सवालमा बनेका रणनीति, कार्ययोजना तथा आएका दस्तावेजहरु कार्यन्वयनका लागि सरकारको ध्यानकर्षण गरेको र अबका दिनमा पनि सहकार्य गरेर काम गर्ने बताए ।

विशेष गरी एशिया प्रान्तमा रहेका सबै प्रकारका अपाङ्गता भएका व्यक्तिहरुको हक हित र अधिकार सुनिश्तिको लागि आयोजना गरिएको कार्यशालामा विभिन्न प्रकारका अपाङ्गता भएका युवाहरुको सहभागिता थियो ।