अध्यादेश अधिनायकवादको सिंढी भएकाे काेइरालाकाे ठहर

३० मंसिर, काठमाडाैं । नेपाली कांग्रेसका प्रभावशाली नेता तथा भावी सभापतिका दाबेदार डा. शेखर काेइरालाले सरकारले भर्खरै ल्याएको संबैधानिक परिषद सम्बन्धि अध्यादेशलाई वर्तमान सरकारको निरिहता र लज्जाजनक कार्यसँग तुलना गर्दै यसलाई अधिनायकवादको सिंढी भएको बताएका छन् ।

आफ्ना दाजु निरञ्जन कोईरालाको स्वास्थ्य अवस्थाबारे जानकारी लिन भारतको नयाँ दिल्लीमा रहेका नेता काेइरालाले अध्यादेश जारी हुनासाथ गरिएको ट्विटमार्फत आफ्नाे आधिकारिक धारणा व्यक्त गर्दै उक्त अध्यादेश तुरुन्त खारेज गर्न सरकार समक्ष जोडदार रुपमा मागसमेत राखेका छन् ।

संबैधानिक परिषदको बैठकमा संसदका सभामुख अनुपस्थित भई सरकार अप्ठ्यारोमा परेपछि मन्त्रीपरिषदको बैठकको निर्णय भन्दै प्रधानमन्त्री ओलीले राष्ट्रपति विद्यादेवी भण्डारी समक्ष उक्त अध्यादेश पेश गरेका थिए ।

सरकारको सिफारिसलाई शिरोपर गर्दै राष्ट्रपति विद्यादेवी भण्डारीले तत्कालै संबैधानिक परिषद् सम्बन्धि अध्यादेशलाई जारी गरेकी थिईन् ।विश्वस्त सुत्रका अनुसार सरकारको सिफारिसमा उक्त अध्यादेश जारी गरिएको भनिएता पनि मन्त्रिपरिषद बैठकमा उक्त अध्यादेश बारे छलफल नै भएको थिएन ।

नेपाली कांग्रेसका प्रभावशाली नेता डा. शेखर काेइरालाले आफ्नाे ट्विटमा लेखेका छन् – संबिधानको मर्म र भावना विपरित ल्याईएको संबैधानिक परिषद सम्बन्धि अध्यादेश तुरुन्तै खारेज गरियोस् । यो अध्यादेश हामीले भन्दै आएको अधिनायकवादको सिंढी हो ।