प्रधानन्यायाधीश राणाका कारण अध्यादेश फिर्ता

२ पुष, काठमाडौं । बाहिर हल्ला चल्यो– प्रधानमन्त्री केपी ओली अध्यादेश फिर्ता लिन तयार भए । हिजो दिउँसो एकाएक राजनीतिक वृत्तमा यो खबर डँढेलो झैं फैलियो । वास्तवमा प्रधानमन्त्री ओली प्रस्ताव फिर्ता लिन तयार भएका थिएनन् । उनले अर्का अध्यक्ष पुष्पकमल दाहाल प्रचण्डलाई प्रष्टै भनेका हुन्– अध्यादेश फिर्ता गर्नुपर्ने भए तपाईंको आरोपपत्र पनि फिर्ता होस् ।

यसका लागि प्रचण्ड तयार थिएनन् । त्यसैले उनी स्थायी कमिटी बैठकस्थलतिर लागे । ओली नजाने भए । यसैबीच, प्रधानमन्त्री ओलीलाई एउटा महत्वपूर्ण फोन आयो । फोन गर्ने महानुभाव थिए– प्रधानन्यायाधीश चोलेन्द्रसम्शेर राणा । राणाले भने – प्रधानमन्त्री ज्यू, हिजो जारी अध्यादेश खारेजीका लागि रिट दायर भयो । अब मैले संवैधानिक परिषदको बैठकमा आउन नमिल्ने भयो ।

प्रधानन्यायधीश राणाको यस्तो जवाफले ओली ब्याक भए । राणा पनि बैठकमा बस्न नमिल्ने भएपछि परिषद बैठक बस्नै नसक्ने भयो । त्यसैले उनी नयाँ ढंगले अगाडि बढ्ने मनस्थितिमा पुगे । लगत्तै उनले महासचिव विष्णु पौडेललाई फोन गर्न लगाए ।

पौडेलसँग सबै कुरा गरेपछि फेरि प्रचण्डसँग वार्ता गर्न शंकर पोखरेल र घनश्याम भूषाललाई परिचालन गरियो । अनि दुबै अध्यक्षबीच आफ्ना अडान फिर्ता गर्ने सहमति जुटेको थियो । राणा बैठकमा बस्ने अवस्था रहन्थ्यो भने ओलीले कुनै हालतमा अध्यादेश फिर्ता गर्ने थिएनन् ।