रानीपोखरीको ‘हटसिट’मा एआईजी पालको स्वागत, भावी आईजीपी पोखरेलको विदाई

२ पुस, काठमाडौं । भावी आईजीपी पक्का भएका एआईजी विश्वराज पोखरेल प्रहरीको अपराध अनुसन्धान विभागमा सरुवा भएको छ । महानगरीय प्रहरी कार्यालय, रानीपोखरीको नेतृत्वमा प्रहरी अतिरिक्त महानिरीक्षक एआईजी हरिबहादुर पाल आएका छन् । केही दिनअघि पोखरेल एआईजीमा बढुवा भएका थिए ।

सरकारले एआईजीको एउटा दरबन्दी थप्दै पोखरेललाई २५ मंसिरमा एआईजीमा बढुवा गरेको हो । त्यसपछि भएको पदस्थापनमा पाल र पोखरेलको सरुवा भएको नेपाल प्रहरीले जनाएको छ ।

सरुवा भएपछि पोखरेलको विदाई पनि गरिएको छ । त्यसक्रममा मातहतका प्रहरी अधिकृतहरुलाई इमान्दारिताका साथ दिइएको जिम्मेवारी पूरा गर्न पालले निर्देशन दिएका छन् ।

उपप्रधानमन्त्री ईश्वर पोखरेलको दबाबमा बढुवा भएका पोखरेललाई भावी आईजीपीको रुपमा हेरिएको छ । तर कनिष्ठलाई एआईजीमा बढुवा गरेर आईजीपीमा प्रतिष्पर्धा बन्द गरेको भन्दै अहिले सरकारको आलोचना भइरहेको छ ।